Rauði krossinn

Úr Wikipediu, frjálsa alfræðiritinu
Rauði krossinn og rauði hálfmáninn, algengustu tákn Rauðakrosshreyfingarinnar

Rauði krossinn er alþjóðleg fjöldahreyfing sem hefur það að markmiði að vernda líf, heilsu og mannréttindi fólks, stuðla að virðingu fyrir mannfólki, og koma í veg fyrir eða lina þjáningar, án þess að gera upp á milli þjóðernis, kynþáttar, trúarskoðana, þjóðfélagsstéttar eða stjórnmálaskoðana.

Í íslömskum löndum er í flestum tilfellum notast við rauðan hálfmána í stað rauða krossins á fánum hreyfingarinnar, þar sem krossinn þykir of tengdur kristinni trú, og á ensku er hreyfingin titluð The International Red Cross and Red Crescent Movement. Einnig hefur verið notuð rauð Davíðsstjarna, en á árinu 2005 var samþykkt nýtt merki, rauði kristallinn, sem hefur engar trúarlegar tilvísanir.

Orðið Alþjóða rauði krossinn er oft notað um hreyfinguna, en í raun er engin stofnun til með því nafni. Hreyfingin samanstendur af nokkrum mismunandi stofnunum sem eru lagalega sjálfstæðar hver frá annarri, en sameinast undir merkjum hreyfingarinnar á grundvelli sameiginlegra gilda, markmiða, táknmynda, reglugerða og stjórnsýslu. Hreyfingin samanstendur af eftirfarandi hlutum:

  • Alþjóðaráð Rauða krossins er líknarfélag stofnað 1863 í Genf í Sviss. Ráðið, sem í sitja 25 meðlimir, hefur sérstakt hlutverk undir alþjóðalögum, við að vernda líf og virðingu fórnarlamba stríðsátaka.
  • Alþjóðasamband Rauða kross félaga stuðlar að samstarfi og samskiptum hinna fjölmörgu landsfélaga Rauða krossins og skipuleggur neyðarhjálp vegna náttúruhamfara eða annarra atburða á alþjóðlegum vettvangi.
  • Landsfélög Rauða krossins eru starfandi í flestum löndum heims, og eru nú um 186 landsfélög viðurkennd af Alþjóðasambandi Rauðakrossfélaganna. Hvert félag starfar í sínu heimalandi í samræmi við gildi alþjóðlegra mannréttindalaga og samþykktir alþjóðahreyfingarinnar. Þau geta líka starfað að einstökum verkefnum sem ekki tengjast alþjóðahreyfingunni beint.

Tengill[breyta | breyta frumkóða]