Jürgen Klinsmann

Úr Wikipediu, frjálsa alfræðiritinu
Jürgen Klinsmann
Klinsmann að sleppa í gegn í leik gegn Dynamo Dresden 1989

Jürgen Klinsmann (30. júlí 1964 í Göppingen) er þýskur knattspyrnumaður og þjálfari. Hann er núverandi þjálfari Suður-Kóreu. Klinsmann lék með fjölmörgum liðum í ýmsum löndum og var ávallt framherji og mikill markaskorari. Eftir að hann hætti knattspyrnuiðkun sneri hann sér að þjálfun. Hann þjálfaði þýska landsliðið í tvö ár og Bayern München í eitt ár.

Leikferill[breyta | breyta frumkóða]

Jürgen Klinsmann fæddist í Göppingen í Suður-Þýskalandi 1964 og byrjaði að æfa með bæjarfélaginu níu ára gamall. Þegar hann var 16 ára flutti fjölskylda hans til Stuttgart, þar sem faðir hans opnaði bakarí. Klinsmann sjálfur lærði bakaraiðn á þessum árum. Árið 1979 bauð félagið Stuttgarter Kickers honum samning, en það var ekki fyrr en tveimur árum seinna sem hann gerðist atvinnumaður hjá því. Þá var hann 18 ára og spilaði með landsliði U-16. 1984 skipti hann yfir í VfB Stuttgart. Með því félagi náði hann miklum árangri sem markaskorari. Í 156 leikjum með félaginu skoraði hann 79 mörk, eða hér um bil eitt mark í öðrum hverjum leik að jafnaði. Samhliða því spilaði hann með landsliði U-21 og Ólympíuliði Þýskalands og var svo valinn í aðallandslið Þýskalands 1987. Með því lék hann 108 leiki og skoraði alls 47 mörk. Hann er þar með þriðji markahæsti markaskorari landsliðsins, ásamt Rudi Völler. Klinsmann varð heimsmeistari 1990 í HM á Ítalíu. Frá München fór Klinsmann til Ítalíu og spilaði með Inter Milan. Hann spilaði næstu árin með ýmsum þekktum félögum víða um Evrópu, svo sem AS Monaco, Tottenham, Bayern München og Sampdoria Genua. Árið 2003 flutti Klinsmann til Kaliforníu og spilaði eitt keppnistímabil með Orange County Blue Star, reyndar aðeins átta leiki. 2004 lagði hann skóna á hilluna, en tók þá við þjálfarastöðu þýska landsliðsins. 2008 tók Klinsmann við Bayern München, en var rekinn í apríl 2009.

Félög Klinsmann sem leikmaður[breyta | breyta frumkóða]

Félag Ár Leikir Mörk
Stuttgarter Kickers 1981-1984 41 22
VfB Stuttgart 1984-1989 156 79
Inter Milan 1989-1992 95 34
AS Monaco 1992-1994 65 29
Tottenham Hotspur 1994-1995 41 21
Bayern München 1995-1997 65 31
Sampdoria Genua 1997 8 2
Tottenham Hotspur 1998 15 9
Orange County Blue Star 2003-2004 8 5

Stórmót[breyta | breyta frumkóða]

Mót Staður Árangur Ath.
OL 1988 Seoul 3. sæti Leikmaður
HM 1990 Þýskaland Meistari Leikmaður
EM 1992 Svíþjóð 2. sæti Leikmaður
HM 1994 Bandaríkin 8. liða úrslit Leikmaður
EM 1996 England Meistari Leikmaður
HM 1998 Frakkland 8. liða úrslit Leikmaður
HM 2006 Þýskaland 3. sæti Þjálfari

Félög sem þjálfari[breyta | breyta frumkóða]

Félag Ár
Þýska landsliðið 2004-2006
Bayern München 2008-2009
Bandaríska landsliðið 2011-2016
Hertha Berlin 2019-2020
Suður-kóreska karlalandsliðið í knattspyrnu 2023-

Annað markvert[breyta | breyta frumkóða]

Klinsmann hefur tvisvar verið kjörinn knattspyrnumaður ársins í Þýskalandi (1988 og 1994) og einu sinni í Englandi (1995). Hann var einnig valinn markahrókur heims 1995.

Jürgen Klinsmann á sitt eigið fyrirtæki, Business Development, sem hann rekur í Bandaríkjunum. Auk þess er gamla fjölskyldubakaríið enn starfrækt í Stuttgart. Klinsmann er kvæntur bandarískri konu, Debbie Chin, og eiga þau tvö börn. Sonur þeirra Jonathan Klinsmann spilar sem markvörður fyrir þýska Bundesliga liðið Hertha Berlin.

Heimildir[breyta | breyta frumkóða]