Elías Mar

Leiði Elíasar Marar í Hólavallakirkjugarði.

Elías Mar (22. júlí 1924 – 23. maí 2007) var íslenskur rithöfundur, ljóðskáld og þýðandi. Foreldrar hans voru Elísabet Jónína Benediktsdóttir verkakona og Cæsar Hallbjörnsson Mar kaupmaður. Elías var fæddur og uppalinn í Reykjavík, en móðir hans lést úr bráðaberklum þega hann var á öðru ári. Elías ólst því upp hjá ömmu sinni, en hún lést þegar hann var sautján ára.

Elías Mar var einn fyrsti íslenski rithöfundurinn til að skrifa samtímasögur úr Reykjavík og skáldsagan Vögguvísa er einatt talin fyrsta unglingasaga sem skrifuð hefur verið á íslensku. Einnig hefur því verið haldið fram að í skáldsögunni Man eg þig löngum komi í fyrsta skipti í íslenskum bókmenntum fram samkynhneigð sögupersóna. Sögur Elíasar hafa verið þýddar á eistnesku, esperanto, færeysku, norsku og þýsku.

Elías Mar starfaði lengst af sem prófarkalesari á Þjóðviljanum.

Verk

Skáldsögur

• Eftir örstuttan leik, 1946
• Man eg þig löngum,1949
• Vögguvísa, 1950 (gefin út í Þýskalandi árið 1958 undir nafninu Chibaba, chibaba: Bruchstück eines Abenteuers)
• Sóleyjarsaga, 1954 og 1959

Smásögur

• Gamalt fólk og nýtt, 1950
• Saman lagt spott og speki, sérprentuð smásaga, 1960
• Það var nú þá, 1985

Ljóð

• Ljóð á trylltri öld, 1951
• Speglun, 1977
• Hinum megin við sólskinið, 1990
• Mararbárur: úrval ljóða 1946-1998, 1999

Þýðingar

• Vonin blíð eftir William Heinesen, 1970
• Óveðursnótt eftir Georges Duhamel, 1951
• Vinur skógarins eftir Leonid Leonov, 1956
• Þriðja stúlkan eftir Aghötu Christie, 1986

Auk þess þýddi Elías fjölda útvarpsleikrita og framhaldssagna fyrir útvarp

Heimildir

• Hjálmar Sveinsson. Nýr penni í nýju lýðveldi. Omdúrman, 2007.

Tenglar

• Viðtal við Elías Mar á vef Samtakanna 78
• Nýr penni í nýju lýðveldi. Elías Mar á sextíu ára rithöfundarafmæli