Litlu-Sundaeyjar

Úr Wikipediu, frjálsa alfræðiritinu
Stökkva á: flakk, leita
Kort sem sýnir Litlu-Sundaeyjar

Litlu-Sundaeyjar (indónesíska: Nusa Tenggara) eru röð lítilla eyja sem mynda suðvesturhluta Sundaeyja. Eyjarnar eru hluti af eldfjallahring, Sundahringnum, sem stafar af niðurstreymi við Sundadjúpálinn í Jövuhafi. Flestar Litlu-Sundaeyja eru hluti af Indónesíu (héruðin Balí, Vestur-Nusa Tenggara og Austur-Nusa Tenggara og syðri hluti Malukuhéraðs), en austurhluti eyjunnar Tímor er ríkið Austur-Tímor.

Litlu-Sundaeyjar mynda tvo aðskilda eyjaklasa. Sá nyrðri telur eyjarnar Balí, Lombok, Súmbava, Flóres og Wetar, sem eru eldfjallaeyjar með nokkur virk eldfjöll. Syðri eyjaklasinn telur eyjarnar Súmba, Tímor og Babareyjar, sem ekki eru eldfjallaeyjar og eru hluti af Ástralíuflekanum. Nyrðri eyjaklasinn á margt sameiginlegt með Mólúkkaeyjum sem eru framhald á honum til austurs.

Lífríki eyjanna telur margar staðbundnar tegundir, þar á meðal kómodódrekann. Breski náttúrufræðingurinn Alfred Russel Wallace setti árið 1859 fram hugmyndina um línu sem greindi milli fánu Asíu og Wallacíu sem er á mörkum Asíu og Ástralíu. Línan liggur um hið djúpa Lomboksund milli eyjanna Balí og Lombok. World Wildlife Fund hefur skilgreint sumargræna skóga Litlu-Sundaeyja sem sérstakt vistsvæði.