Háskólinn í Reykjavík

Háskólinn í Reykjavík er einkarekinn háskóli í Reykjavík sem útskrifar nemendur úr viðskiptafræði, tölvunarfræði, tæknifræði, verkfræði, kennslufræði, lýðheilsufræði, íþróttafræði, sálfræði og lögfræði og auk þess starfrækir skólinn stjórnendaskóla.

Bakhjarl og stjórn

Skólinn er rekinn af Sjálfseignarstofnun Viðskiptaráðs Íslands um viðskiptamenntun (SVÍV) og lýtur stjórn sem skipuð er af Viðskiptaráði Íslands, Samtökum atvinnulífsins og Samtökum iðnaðarins. Í háskólaráði sitja auk rektors fimm einstaklingar úr atvinnulífinu. Háskólaráð ræður rektor en hann skipar svo í stöðu deildarforseta og yfirmanna stoðsviða. Framkvæmdastjórn skólans skipa rektor, deildarforsetar, framkvæmdastjóri fjármála, framkvæmdastjóri Opna háskólans, framkvæmdastjóri mannauðs og gæða, formaður rannsóknarráðs og formaður námsráðs.

Háskólinn í Reykjavík hefur gert þjónustusamning við menntamálaráðuneytið sem m.a. kveður á um að ríkið greiði tiltekna upphæð fyrir hvern nemanda í skólanum. Þar fyrir utan eru innheimt skólagjöld, sem skólaárið 2010-2011 verða 154.000 krónur á önn í grunnnámi, en frá 348-812 þúsund krónur á önn í framhaldsnámi. Samkvæmt fyrrverandi Rektor HR, Svöfu Grönfeldt, mynda skólagjöldin um 25% af tekjum skólans, framlög frá atvinnulífinu 25% en 50% af tekjunum koma frá ríkinu. Sem gott dæmi um þessi framlög frá atvinnulífinu má nefna að í september 2007 tilkynnti auðmaðurinn Róbert Wessmann, fyrrverandi forstjóri Actavis, að hann myndi leggja einn milljarð króna til þróunarsjóðs HR. Segir í tilkynningu skólans sama dag: "Reykjavík er með þessu komið á kortið sem alþjóðlegri háskólaborg og útrás Íslendinga á sviði menntunar er hafin." Af öðrum samstarfsaðilum HR í gegnum tíðina má m.a. nefna VÍS, Glitnir, Eimskip, Sjóvá og Orkuveita Reykjavíkur.

Tekjumódel skólans hefur verið gagnrýnt þónokkuð. Hefur m.a. verið bent á að raunverulegur fjárstuðningur ríkisins við skólann sé nokkuð hærri, þar sem Lánasjóður íslenskra námsmanna lánar fyrir skólagjöldum vegna náms við Háskólann í Reykjavík. Vegna hagstæðra kjara fyrir námsmenn eru námslán dýr fyrir ríkið, sem getur í raun eingöngu búist við að fá helming raunvirðis lánsins greitt til baka. Hafa sumir gagnrýnt að Háskólinn í Reykjavík geti hækkað skólagjöld sín og þar með fengið óbeinan ríkisstyrk í gegnum námslán nemenda sinna.

Sögulegt ágrip

Háskólinn í Reykjavík á rætur að rekja til Tölvuháskóla Verzlunarskóla Íslands (TVÍ) sem stofnaður var í janúar 1988 og starfræktur í húsnæði Verzlunarskóla Íslands um tíu ára skeið. Háskólinn í Reykjavík var settur í fyrsta sinn hinn 4. september 1998 í nýrri byggingu við Ofanleiti 2, undir nafninu Viðskiptaháskólinn í Reykjavík. TVÍ varð önnur tveggja deilda hins nýja háskóla. Í janúar 2000 var ákveðið að breyta nafni skólans í Háskólinn í Reykjavík þar sem gamla nafnið þótti ekki nógu lýsandi fyrir starfsemi skólans. HR og Tækniháskóli Íslands sameinuðust undir merkjum hins fyrrnefnda 4. mars 2005. Nú hefur verið ákveðið að framtíðarstaðsetning skólans verði í Vatnsmýrinni og er gert ráð fyrir að starfsemi hans hefjist þar 2009.

Tengill

• Heimasíða skólans