Buskerud

Kort sem sýnir staðsetningu Buskerud innan Noregs

Buskerud er fylki í Noregi. Nágrannafylki þess eru Osló, Upplönd, Þelamörk, Vestfold, Sogn og Firðafylki og Hörðaland. Heildarflatarmál fylkisins er 14.930 km² og íbúar voru 245.225 árið 2005. Fylkið er í landshlutanum Austurland.

Náttúrufar

Fylkið nær frá Hurum í Óslóarfirði inn til Hallingdals og Harðangursheiðar. Inn til fjalla eru mörg dalverpi og fjallgarðar en austar og neðar í fylkinu er láglendara og skiptast á lágir, grónir ásar og dalir. Fylkið er allt skógi vaxið, upp að hæðarmörkum skóga í fjallendum. Þar tekur við hefðbundnari heiðagróður.

Lengsta á Buskerud er Numedalslågen, en hún hefur upptök sín á Hörðalandi og rennur í Óslóarfjörð í Vestfold. Stærstu stöðuvötnin eru Tyrifjorden og Krøderen, en það fyrrnefnda er fimmta stærsta vatn Noregs.

Atvinna

Helstu atvinnuvegir í fylkinu eru landbúnaður, skógarhögg og alls kyns iðnaður auk þess sem þjónusta er vaxandi atvinnugrein. Stærsta borg og jafnframt aðsetur stjórnsýslu fylkisins er Drammen.

Skjaldarmerki

Skjaldarmerki Buskerud

Skjaldarmerki Buskerud er blár björn á silfurgráum bakgrunni. Ástæðan er sú að fram á 8. áratug síðustu aldar voru margir bjarnarstofnar í fylkinu. Blái liturinn á að endurspegla kobaltbláa litinn sem framleiddur var í Modum en grái liturinn á að endurspegla silfurnámurnar í Kongsberg.

Sveitarfélög

Innan Buskerud er 21 sveitarfélag. Þau eru eftirfarandi:

1 Drammen 2 Flesberg 3 Flå 4 Gol 5 Hemsedal 6 Hol 7 Hole 8 Hurum 9 Kongsberg 10 Krødsherad 11 Lier

12 Modum 13 Nedre Eiker 14 Nes 15 Nore og Uvdal 16 Ringerike 17 Rollag 18 Røyken 19 Sigdal 20 Øvre Eiker 21 Ål