Refir

Refur
Vísindaleg flokkun
Ríki: Dýraríki (Animalia) Fylking: Seildýr (Chordata) Flokkur: Spendýr (Mammalia) Ættbálkur: Rándýr (Carnivora) Ætt: Hundaætt (Canidae) Ættflokkur: Vulpini

Refir eru lítil og meðalstór rándýr af hundaætt (Canidae). Til eru um 27 tegundir refa. Refir lifa í flestum heimsálfum en algengastir þeirra eru rauðrefir (Vulpes vulpes). Refir eru þekktir úr þjóðsögum margra þjóða um allan heim.

Nöfn á refum eru ólík nöfnum flestra annarra hunddýra. Karldýrin eru oftast nefnd steggur eða högni en einnig kemur fyrir að þeir séu nefndir refur. Kvendýrin eru nefnd læða eða bleiða en einnig kemur fyrir að þær séu nefndar tófur. Afkvæmi refa kallast yrðlingar.

Almenn einkenni

Rauðrefur

Heimskautarefur

Eyðimerkurrefur

Flestir refir lifa í tvö til þrjú ár en geta lifað í allt að tíu ár og jafnvel lengur í dýragörðum. Flestar tegundir refa eru á stærð við holdugan heimiliskött og eru því töluvert minni en aðrar tegundir innan hundaættar, svo sem úlfur, sjakalar, og hundar.

Refir hafa venjulega hvasst trýni og þykkloðna rófu sem kölluð er tæfill. Flest önnur einkenni eru breytileg eftir heimkynum refa. Eyðimerkurrefir hafa til að mynda stór eyru og snöggan feld en heimskautarefir hafa lítil eyru og þykkan og hlýjan feld.

Refir eru yfirleitt ekki hópdýr, ólíkt flestum öðrum tegundum innan hundaættar. Þeir eru jafnan einfarar og tækifærissinnar þegar kemur að æti. Þeir veiða oftast lifandi bráð en éta einnig hræ, ávexti og ber.

Refir teljast fremur mannafælur en hitt og flokkast ekki sem góð gæludýr. Það er helst að temja megi silfurrefi eins og í Rússlandi þar sem þeir hafa verið ræktaðir í um hálfa öld. Þrátt fyrir mannfælni villtra refa sjást þeir býsna oft nálægt mannabústöðum.

Flokkun

Til refa teljast eftirfarandi ættkvíslir:

• Vulpes
  • Rauðrefur, Vulpes vulpes
  • Vulpes velox
  • Vulpes macrotis
  • Vulpes corsac
  • Vulpes chama
  • Vulpes pallida
  • Bengalrefur, Vulpes bengalensis
  • Tíbetskur refur, Vulpes ferrilata
  • Blanfords-refur, Vulpes cana
  • Rueppels-refur, Vulpes rueppelli
  • Vulpes corsac
  • Eyðimerkurrefur, Vulpes zerda (áður Fennecus zerda)
• Alopex (stundum talinn til „raunverulegra“ refa í ættkvíslinni vulpes)
  • Heimskautarefur, Alopex lagopus
• Otocyon
  • Otocyon megalotis
• Urocyon
  • Grárefur, Urocyon cinereoargenteus
  • Eyjarefur, Urocyon littoralis

Tengt efni

• Refaveiðar

Tenglar

• Vísindavefurinn: „Hvað verða refir gamlir?“
• Vísindavefurinn: „Hvað eru refir og úlfar mikið skyldir?“
• Vísindavefurinn: „Geta hundar og refir eignast saman afkvæmi?“
• Vísindavefurinn: „Hvað eru yrðlingar stórir við fæðingu?“
• Vísindavefurinn: „Eru til margar tegundir af refum á Íslandi og hverjar eru þær?“
• Vísindavefurinn: „Hvernig erfist litur á feldi tófunnar?“
• Vísindavefurinn: „Hvar á landinu er mest veitt af tófum, minkum og selum?“
• Refaveiðar; grein í Morgunblaðinu 1971