Notandi:Skrúfhyrna/sandkassi

Opinber þróunarsamvinna

Opinber þróunarsamvinna, stundum nefnd opinber þróunaraðstoð, er fjárhagslegur stuðningur veittur af opinberum stjórnvöldum hinna ýmsu ríkja heimsins til að styðja við hagvöxt og aukna velferð í þróunarríkjum. Stuðningurinn getur runnið beint til ríkja eða til fjölþjóðastofnana. Þróunarsamvinnunefnd Efnahags- og framfarastofnunarinnar skilgreindi hugtakið opinber þróunarsamvinna árið 1969 og birtir á hverju ári upplýsingar um þær upphæðir sem ríki heims veita í þessum tilgangi.

Þróunarsamvinna getur verið tvíhliða, en í því tilviki rennur stuðningurinn beint frá stjórnvöldum í einu ríki til annars ríkis, eða marghliða, en þá rennur stuðningurinn til alþjóðastofnana, t.d. Alþjóðabankans eða stofnana Sameinuðu þjóðanna, sem nota hann til verkefna í þróunarríkjum. Marghliða þróunarsamvinna er einnig nefnd fjölþjóðleg. Á árinu 2018 námu heildarframlög til opinberrar þróunarsamvinnu nær 153,5 milljörðum bandaríkjadala. Af þeim voru 71,2% skilgreind sem tvíhliða þróunarsamvinna og 28,8% marghliða.