Jón Helgason (alþingismaður)

Mynd:Jonhelgason.jpg

Jón Helgason (f. 4. október 1931) var bóndi í Seglbúðum í Landbroti og í 21 ár alþingismaður og fimm ár ráðherra.

Fjölskylda

Foreldrar Jóns voru Helgi Jónsson (1894 – 1949) og kona hans, Gyðríður Pálsdóttir (1897 – 1994). Þau bjuggu í Seglbúðum. Jón gekk 1961 að eiga Guðrúnu Þorkelsdóttur (f. 1929). Börn þeirra voru: Helga (f. 1968) og Bjarni Þorkell (f. 1973) og fóstursonur Björn Sævar Einarsson (f. 1962).

Æviatriði

Jón ólst upp í Seglbúðum en fór þaðan til náms og lauk stúdentsprófi frá Menntaskólanum í Reykjavík 1950. Síðan hafði hann forstöðu á búi móður sinnar og tók að fullu við búsforráðum í Seglbúðum 1959. Hann varð einkum nafnkunnur fyrir sauðfjárrækt. Á árunum 1974 – 1995 sat Jón á alþingi fyrir Suðurlandskjördæmi, og meðal annars var hann forseti Sameinaðs Alþingis 1979 – 1983. Auk þess var hann dóms- og kirkjumálaráðherra 1983 – 1987 og landbúnaðarráðherra 1983 – 1988.

Nokkur aukastörf

• Formaður í Ungmennafélaginu Ármanni 1951 – 1954.
• Endurskoðandi hjá Kaupfélagi Skaftfellinga 1951 – 1972 og stjórnarformaður 1972 – 1983.
• Formaður í Framsóknarfélögunum í Vestur-Skaftafellssýslu 1955 – 1974.
• Fulltrúi á fundum hjá Stéttarsambandi bænda 1961 – 1975 og stjórnarmaður þess 1972 – 1979.
• Stundakennari í unglingaskólanum á Kirkjubæjarklaustri 1966 – 1970.
• Hreppsnefndarmaður í Kirkjubæjarhreppi 1966 – 1986, þar af oddviti 1967 – 1976.
• Stjórnarmaður í Framleiðsluráði landbúnaðarins 1972 – 1979.
• Fulltrúi á Búnaðarþingi 1973 – 1975.
• Sýslunefndarmaður í Vestur-Skaftafellssýslu 1974 – 1978.
• Stjórnarmaður hjá Rafmagnsveitum ríkisins 1978 – 1983.
• Stjórnarmaður í Endurbótasjóði menningarstofnana 1990 – 2002.
• Formaður í Búnaðarfélagi Íslands 1991 – 1995.
• Sóknarnefndarmaður í Prestsbakkasókn og forseti Kirkjuþings.
• Fulltrúi Alþingis og bænda á ýmsum erlendum vettvangi.
• Sat í Orðunefnd (hafði sjálfur verið sæmdur stórriddarakrossi Fálkaorðunnar 1981).
• Starfaði innan bindindishreyfingarinnar.

Ritverk og ræður

Jón ritaði um föður sinn í bókina Faðir minn – bóndinn (Reykjavík 1975). Og hann ritaði um Kirkjubæjarhrepp í bókina Sunnlenskar byggðir VI (bls. 85 – 187, Búnaðarsamband Suðurlands 1985), sem er rannsókn á byggðasögu. Hann flutti einnig margar ræður vegna hinna opinberu starfa sinna, auk heldur stundum endranær, prédikaði til dæmis um friðarmál í dómkirkjunni í Reykjavík 12. september 1982.

Heimildir

• Torfi Jónsson: Æviskrár samtíðarmanna 2, bls. 147 – 148, Hafnarfirði 1983.
• Æviágrip á vef Alþingis. Skoðað 18. október 2010.