Diego

Diego nafnið er afbrigði af nafninu Duguo eða Dugas.

Uppruni nafnsins Diego

Hér á Íslandi má rekja nafnið til Hjálmars Diego Jónssonar sem fæddur var á Þingeyri 1891. Faðir hans var John Baptiste Duguo, amerískur skipstjóri er sigldi til Íslands árlega á árunum 1884 til 1897 til að veiða lúðu fyrir Bandaríkjamarkað.

John Baptiste Duguo fæddist í Nova Scotia í Kanada. Hann var ekki af spænskum ættum heldur voru forfeður hans komnir af frönskum landnemum sem voru á meðal fyrstu Evrópumanna er settust að í Norður-Ameríku á því svæði sem kallað er Acadia. John Baptiste fæddist á Isl. Madam við Bretoskaga í Nova Scotia árið 1840 og var upphaflega gefið nafnið Jean Baptiste Dugas en breytti því eftir að hann flutti til Gloucester í Massachusetts þar sem hann varð bandarískur ríkisborgari árið 1868.

Sá sem fyrstur bar Dugas nafnið í Ameríku var Abraham Dugas sem kom frá Toulouse í Frakklandi. Hjálmar Diego var 9. ættliður kominn í beinan karllegg frá þessum Abraham Dugas, en hann var fæddur 1618, eða þar um bil.

Ættarnafnið Diego var fyrst borið af Hjálmari. Hvernig það varð til er ekki fullljóst, en það kemur þó fram bæði í íslenskum og amerískum verslunargögnum tengdum Gramsverslun á Þingeyri við Dýrafjörð.

Diego - Duguo - Dugas

Til eru margar útfærslur á eftirnafni John Baptiste. Hann var skírður upp á frönsku „Jean Baptiste Dugas“ í fæðingarbæ sínum á Nowa Scotia. Hann fluttist svo ungur sjómaður til hafnarborgarinnar Gloucester í Bandaríkjunum 1856. Þar voru fyrir menn af ýmsum þjóðernum og talaði hver sína tungu. Snarlega breyttist fornafn hans í John.

Dugas er franskt nafn og fellur ekki endilega vel að enskri tungu. Ýmsar útfærslur voru reyndar. Dago var ein þeirra og hélt um skeið. Um það leyti sem hann var að fá ríkisborgararéttinn breyttist það endanlega í Duguo og segir nánar frá því í bókinni Undir miðnætursól.

Diego, já!

Hjálmar Diego Jónsson giftist Halldóru Friðgerði Sigurðardóttur, sem þá bjó í föðurhúsum í Bolungarvík. Hún var fædd á Steinhólum í Grunnavík 16. maí 1893, dáin í Reykjavík 27. janúar 1951. Árið 1913 eignuðust þau Halldóra og Hjálmar frumburð sinn, Friðrik Aðalsteinn Diggo. 31. maí 1916 fæddist þeim annar sonur og var hann skírður Þorkell Guðmunds Diggó. Rithátturinn skiptir ekki máli.