Akrahreppur

Úr Wikipediu, frjálsa alfræðiritinu
Stökkva á: flakk, leita
Akrahreppur
Staðsetning sveitarfélagsins
Sveitarfélagsnúmer 5706
Kjördæmi Norðvesturkjördæmi
Flatarmál
 – Samtals
23. sæti
1.360,6 km²
Mannfjöldi
 – Samtals
 – Þéttleiki
61. sæti
208 (2014)
0,15/km²
Oddviti Agnar Halldór Gunnarsson
Þéttbýliskjarnar Engir
Póstnúmer 560

Akrahreppur (áður kallaður Blönduhlíðarhreppur) er hreppur í Skagafjarðarsýslu, austan Héraðsvatna, norðan frá Kyrfisá allt suður að Hofsjökli. Aðalatvinnuvegur er landbúnaður og er ekkert þéttbýli í sveitarfélaginu. Grunnskóli hreppsins var á Stóru-Ökrum, í félagsheimilinu Héðinsminni, frá 1949 til 2006 en í kjölfar deilna milli foreldra og kennara var hann lagður niður og síðan hefur nemendum verið ekið í skóla í Varmahlíð.

Fjórar kirkjur eru í Akrahreppi, á Flugumýri, Miklabæ, Silfrastöðum og Ábæ í Austurdal en Ábæjarsókn er nú öll í eyði. Lítils háttar jarðhiti er á nokkrum stöðum í Akrahreppi og var byggð sundlaug á Víðivöllum árið 1938, sem ekki er lengur í notkun. Nú hefur hitaveita verið lögð frá Varmahlíð um mestalla Blönduhlíð.

Landafræði[breyta]

Sveitarfélagið nær yfir Blönduhlíð og Norðurárdal, Kjálka og Austurdal allan nema hvað bærinn Bústaðir tilheyrir Sveitarfélaginu Skagafirði. Nokkur eyðibýli í Vallhólmi tilheyra einnig Akrahreppi þótt þau séu nú vestan Héraðsvatna, sem hafa breytt um farveg á þessum slóðum. Víðlend afréttarlönd tilheyra sveitarfélaginu, Silfrastaðaafrétt og Nýjabæjarafrétt.

Saga[breyta]

Akrahreppur er sögusvið margra stórviðburða Sturlungaaldarinnar, þar á meðal Örlygsstaðabardaga (fjölmennustu orrustunnar), Haugsnesbardaga (mannskæðustu orrustunnar) og Flugumýrarbrennu.

Skáldið Hjálmar Jónsson bjó á ýmsum bæjum í Akrahreppi á 19. öld og er jafnan kenndur við einn þeirra, Bólu í Blönduhlíð.

Hreppsnefnd[breyta]

Hreppsnefnd Akrahrepps, kosin í sveitarstjórnarkosningum 2010: Agnar Gunnarsson, Eiríkur Skarphéðinsson, Jón Sigurðsson, Þorkell Gíslason og Þorleifur Hólmsteinsson.

Í hreppsnefnd Akrahrepps sitja 5 fulltrúar sem kjörnir eru hlutfallskosningu á fjögurra ára fresti. Síðast var kosið í hreppsnefnd í sveitarstjórnarkosningunum 29. maí 2010.

Oddvitar [1]

Heimildir[breyta]

  1. Byggðasaga Skagafjarðar IV. bindi Akrahreppur, ritstjóri Hjalti Pálsson, bls 50