12-spora kerfi

Úr Wikipediu, frjálsa alfræðiritinu
Stökkva á: flakk, leita

12 spora kerfið er meðferðartækni sem upphaflega var þróuð af stofnendum AA-samtakanna til að hjálpa fólki að takast á við alkóhólisma og var fyrst sagt frá þeim í bókinni Alcoholics Anonymous: The Story of How More Than One Hundred Men Have Recovered From Alcoholism árið 1939. Aðferðin byggir á eldri aðferð sem stofnendur fengu í arf frá "The Oxford Group" sem heitir í dag "IofC" og er starfandi í mörgum löndum [1].

Aðferðin hefur síðan verið þróuð og aðlöguð að meðferð við ýmsum öðrum fíknum og öðrum vandamálum, svo sem fíkniefnaneyslu, spilafíkn, ofáti, meðvirkni, kaupfíkn, kynlífsfíkn og fleiru.

Sporin tólf, eins og þau voru upphaflega sett fram af AA-samtökunum, eru þessi:

  1. Við viðurkenndum vanmátt okkar gagnvart áfengi og að við gætum ekki lengur stjórnað eigin lífi.
  2. Við fórum að trúa að máttur okkur æðri gæti gert okkur andlega heilbrigð að nýju.
  3. Við tókum þá ákvörðun að fela líf okkar og vilja umsjá Guðs, samkvæmt skilningi okkar á honum.
  4. Við gerðum rækilega og óttalaust siðferðileg reikningsskil í lífi okkar.
  5. Við játuðum misgjörðir okkar fyrir Guði, sjálfum okkur og annarri manneskju og nákvæmlega hvað í þeim fólst.
  6. Við vorum þess albúin að láta Guð fjarlægja alla skapgerðarbrestina.
  7. Við báðum Guð í auðmýkt að losa okkur við brestina.
  8. Við skráðum misgjörðir okkar gagnvart náunganum og urðum fús til að bæta fyrir þær.
  9. Við bættum fyrir brot okkar milliliðalaust svo framarlega sem það særði engan.
  10. Við iðkuðum stöðuga sjálfsrannsókn og þegar út af bar viðurkenndum yfirsjónir okkar umsvifalaust.
  11. Við leituðumst við með bæn og hugleiðslu að styrkja vitundarsamband okkar við Guð, samkvæmt skilningi okkar á honum, og báðum um það eitt að vita vilja hans og hafa mátt til að framkvæma hann.
  12. Við urðum fyrir andlegri vakningu er við stigum þessi spor og reyndum því að flytja öðrum alkóhólistum þennan boðskap og fylgja þessum meginreglum í lífi okkar og starfi.