Ólafur Friðrik Magnússon

Úr Wikipediu, frjálsa alfræðiritinu

Ólafur F. Magnússon (f. 3. ágúst 1952 á Akureyri) er borgarstjóri í Reykjavík. Ólafur lauk embættisprófi í læknisfræði frá Háskóla Íslands 1978 og sérfræðinámi í heimilislækningum 1984 frá háskóla í Svíþjóð.

[breyta] Stjórnmálaferill

Ólafur hefur starfað í borgarstjórn frá 1990, fyrst sem varaborgarfulltrúi Sjálfstæðisflokksins en 1998 var hann kjörinn einn af aðalborgarfulltrúum flokksins.^[1] Árið 2001 urðu árekstrar á milli Ólafs og annarra flokksmanna í umhverfismálum en hann var andvígur virkjana- og stóriðjuframkvæmdum á Austurlandi. Á landsfundi flokksins í október bar hann upp tillögu um að hætt yrði við framkvæmdir við Kárahnjúka og að tryggt yrði að orkuauðlindir lentu ekki í höndum einkaaðila.^[2] Tillagan hlaut mjög dræmar undirtektir og var Ólafur við þetta tækifæri kallaður „hryðjuverkamaður“.^[3] Í desember sagði hann sig úr Sjálfstæðisflokknum og sat út kjörtímabilið sem óháður borgarfulltrúi.^[4]

Ólafur var kjörinn borgarfulltrúi af lista Frjálslyndra og óháðra (F-listanum) í sveitarstjórnarkosningum 2002 og aftur 2006. F-listinn hafði þá sérstöðu að vera alfarið á móti flutningi Reykjavíkurflugvallar úr Vatnsmýri. Eftir kosningarnar 2006 tóku við skammvinnar meirihlutaviðræður Ólafs við fyrrverandi samherja sína í Sjálfstæðisflokknum en þær báru ekki árangur.^[5] Skömmu fyrir alþingiskosningarnar 2007 gekk hann til liðs við Íslandshreyfinguna.^[6]

Ólafur var í veikindaleyfi haustið 2007 þegar svokallað REI-mál kom upp og sprengdi þáverandi meirihluta Framsóknar- og Sjálfstæðismanna. Fyrsti varamaður F-listans, Margrét Sverrisdóttir, myndaði þá nýjan meirihluta með Framsókn, Samfylkingu og Vinstri-grænum. Ólafur sneri aftur í desember og tók þá við embætti forseta borgarstjórnar af Margréti. Athygli vakti að hann var látinn skila læknisvottorði við endurkomuna enda sjaldgæft að þess sé krafist af kjörnum fulltrúum.^[7]

Þann 21. janúar 2008 tilkynnti Ólafur ásamt borgarstjórnarflokki Sjálfstæðisflokksins að þeir hefðu náð saman um myndun nýs meirihluta. Ólafur sagði ástæðuna fyrir slitum gamla meirihlutans þá að F-listinn hefði átt erfitt með að koma sínum áherslumálum að í fjögurra flokka samstarfinu. Stefnumál hins nýja meirihluta eru m.a. að varðveita „19. aldar götumynd“ í miðborginni og festa flugvöllinn í sessi í aðalskipulagi og taka enga ákvörðun um flutning hans á kjörtímabilinu.^[8] Ólafur var kjörinn borgarstjóri á fundi borgarstjórnar 24. janúar 2008 við hávær mótmæli áhorfenda. Gera þurfti hlé á fundinum vegna látanna á meðan áhorfendapallar voru rýmdir.^[9]

Áætlað er að Ólafur verði borgarstjóri þangað til 22. mars 2009 og að þá muni Hanna Birna Kristjánsdóttir leiðtogi borgarstjórnarflokks Sjálfstæðisflokksins, taka við.^[10]

[breyta] Heimildir

• Ferill Ólafs F. Magnússonar, borgarstjóra, á heimasíðu Reykjavíkurborgar
• Frétt um myndun meirihluta F-lista og D-lista á mbl.is
• Grein um feril Ólafs á visir.is

[breyta] Neðanmálsgreinar

1. ↑ Ferill Ólafs F. Magnússonar. Reykjavíkurborg.
2. ↑ Ríkisútvarpinu breytt í hlutafélag, en sölu hafnað. Morgunblaðið (16. október 2001).
3. ↑ Björn Bjarnason (14. október 2001). Lokadagur landsfundar.
4. ↑ Borgarfulltrúi segir sig úr Sjálfstæðisflokknum. Morgunblaðið (21. desember 2001).
5. ↑ Ólafur segir sendiboða frá Vilhjálmi hafa komið til sín á kjördag. Morgunblaðið (29. maí 2006).
6. ↑ Viðtal við Ólaf F. í Silfri Egils (myndband). Ríkisútvarpið (2. desember 2007).
7. ↑ Ólafur F. látinn skila vottorði. 24 stundir (30. nóvember 2007).
8. ↑ F-listi og D-listi í samstarf. Morgunblaðið (21. janúar 2008).
9. ↑ Troðfullir pallar í Ráðhúsinu og púað á nýjan meirihluta (24. janúar 2008).
10. ↑ Sjálfstæðismenn kosnir í helstu embætti borgarinnar. Vísir (24. janúar 2008). Skoðað 27. janúar, 2008.

Fyrirrennari: Dagur B. Eggertsson

Borgarstjóri Reykjavíkur (24. janúar 2008 – )

Eftirmaður: enn í embætti