Layne Staley

Layne Staley (1992)

Layne Thomas Staley (fæddur 22. ágúst árið 1967 – látinn 5. apríl árið 2002) var bandarískur tónlistarmaður og þekktastur sem söngvari grugg-hljómsveitarinnar Alice in Chains.

Ferill

Fyrri ár

Staley ólst upp í Kirkland, Washingtonfylki. Hann var 7 ára þegar foreldrar hans skildu og lýsti því yfir seinna að skilnaðurinn hafi haft mikil áhrif á hann og að faðir hans hafi horfið sjónum fjölskyldunnar. Stayle spilaði á trommur 12 ára gamall og sem unglingur stofnaði hann hljómsveitir í glysrokk-stíl.

Árið 1984 stofnaði Staley í hljómsveitina Sleze með skólafélögum. Hljómsveitin breytti nafninu í Alice N' Chains árið 1986 og spilaði aðallega ábreiðulög úr þrassi. Hljómsveitin leystist upp og Staley gekk í funk-hljómsveit. Hann hafði hitt gítarleikarann Jerry Cantrell í æfingahúsnæði og þeir urðu fljótt vinir. Staley bað Cantrell um að ganga í funk-hljómsveitina og féllst hann á það ef Staley gengi í sína eigin nýstofnuðu hljómsveit. Staley leysti funk-hljómsveitina upp og eftir varð ný hljómsveit sem tók upp nafn fyrra bands Staleys með eilítið breyttu sniði; Alice in chains. Þetta var árið 1987.

Seinni ár

Alice in chains átti velgengni að fagna með smáskífunni Man in the Box árið 1990 og síðar varð platan Dirt (1992) vinsæl með grugg-bylgjunni sem tröllreið tónlistarheiminum þá.

Staley hvarf úr sviðsljósinu eftir mitt ár 1996 þegar hann hafði meðal annars spilað á Unplugged MTV tónleikum með Alice in Chains. Hann spilaði aldrei aftur á tónleikum. Hann var einnig á seinni tíma tónlistarferils sínum í hliðarhljómsveitunum Mad Season með meðlimum Pearl Jam og Screaming Trees og sveitinni Class of '99 ásamt Tom Morello.

Árið 1998 tók Staley upp tvö ný lög með Alice in Chains í tilefni útgáfu safnskífunnar Music Bank. En þá var orðið ljóst að hann var djúpt sokkinn í vímuefnaneyslu heróíns og krakks og vó hann einungis um 40 kíló. Næstu ár einangraði hann sig að mestu frá fólki og hélt sig í íbúð sinni.

Þann 19. apríl árið 2002, var farið að grennslast fyrir um Staley þar sem hann hafði ekki tekið út pening í tvær vikur. Haft var samband við fyrrum umboðsmann hans Susan Silver (fyrrum eiginkonu Chris Cornell) og hún hafði samband við lögreglu sem fann hann látinn á heimili sínu. Hann hafði tekið of stóran skammt af efnum (speedball) og verið látinn í tvær vikur þegar hann fannst.

Alice in Chains hætti formlega eftir dauða hans en sveitin hafði verið þó verið nær óvirk í um 6 ár fram að því. Árið 2005 ákvað sveitin að koma saman aftur á styrktartónleikum með nýjum söngvara og hefur starfað upp frá því.

Heimild

Fyrirmynd greinarinnar var „Layne Staley“ á ensku útgáfu Wikipedia. Sótt 31. jan. 2017.