Mikhail Tal
Mikhail Tal | |
|---|---|
 Mikhail Tal (1960) | |
| Fæddur | Mikhail Nekhemievich Tal 9. nóvember 1936 |
| Dáinn | 28. júní 1992 |
| Þekktur fyrir | skák |
| Titill | Stórmeistari, Heimsmeistari |
Mikhail Tal (rússneska: Михаил Нехемьевич Таль; 9. nóvember 1936 – 28. júní 1992) var lettneskur stórmeistari og áttundi heimsmeistarinn í skák. Hann fæddist í Riga í Lettlandi.
Tal er einnig þekktur undir nafninu „töframaðurinn frá Riga“ fyrir afar flókinn, taktískan skákstíl og leikfléttur, sem margir líktu við töfrabrögð.
Tal var afar vel liðinn í skákheiminum.[heimild vantar] Til að mynda er minningarmót, Tal Memorial, haldið honum til heiðurs á hverju ári í Moskvu, þar sem margir af sterkustu stórmeisturum heims taka jafnan þátt.
Árið 1960 háði Mikhail Tal, einungis 23 ára gamall, einvígi við þáverandi heimsmeistara, Mikhail Botvinnik um heimsmeistaratitilinn. Tal vann einvígið 12.5-8.5 og varð heimsmeistari í skák í kjölfarið, sá yngsti frá upphafi (Garry Kasparov sló þetta met árið 1985 þegar hann vann titilinn 22 ára gamall). Tal hélt titlinum aðeins í eitt ár þar sem hann tapaði fyrir Botvinnik í einvígi um heimsmeistaratitilinn árið 1961. Tal tefldi aldrei aftur einvígi um heimsmeistaratitilinn, en var í hópi fremstu skákmanna heims allt til dauðadags. Hann tefldi m.a. á fjölmörgum millisvæða- og áskorendamótum og varð margoft skákmeistari Sovétríkjanna sálugu. Hann tefldi margoft á Íslandi, fyrst árið 1957 á heimsmeistaramóti stúdenta.
Tal ritaði bók um fyrra einvígi sitt við Botvinnik sem kom út á vegum Skákprents í íslenskri þýðingu Braga Halldórssonar árið 1975.
Heilsa
[breyta | breyta frumkóða]Tal var alla tíð við slæma heilsu og þurfti m.a. að hætta þátttöku í áskorendamóti í Curaçao á Kúbu vegna veikinda á árinu 1962. Hann glímdi m.a. við nýrnasjúkdóm sem að lokum dró hann til dauða. Almennt er heilsuástand Tals talið hafa átt sinn þátt í slælegri frammistöðu hans á móti Botvinnik í einvíginu árið 1961. Ekki bætti svo úr skák að Tal bæði reykti og drakk.
Tal var einnig bæklaður á hægri hönd, þannig að fingur hans voru vafnir og mynduðu tvo stærri fingur (sjá mynd).
Heimildir
[breyta | breyta frumkóða]- Alfræðibókin um skák. Dr. Ingimar Jónsson. Iðunn 1988.