Yoshihiko Noda

Yoshihiko Noda
野田 佳彦
Yoshihiko Noda árið 2011.
Forsætisráðherra Japans
Í embætti 2. september 2011 – 26. desember 2012
Þjóðhöfðingi	Akihito
Forveri	Naoto Kan
Eftirmaður	Shinzō Abe
Persónulegar upplýsingar
Fæddur	20. maí 1957 (1957-05-20) Funabashi, Chiba, Japan
Stjórnmálaflokkur	Lýðræðisflokkurinn (1998–2016)
Maki	Hitomi Noda (g. 1970)
Börn	2
Háskóli	Waseda-háskóli

Yoshihiko Noda (japanska: 野田 佳彦; f. 20. maí 1957) er japanskur stjórnmálamaður sem var forsætisráðherra Japans frá 2011 til 2012. Noda var leiðtogi Lýðræðisflokksins, sem fór fyrir ríkisstjórn Japans frá 2009 til 2012.

Noda var fjármálaráðherra í ríkisstjórn forvera síns, Naoto Kan. Hann þótti varkár í því embætti og hafði lýst sig fylgjandi því að hækka skatta á tekjuháa til að mæta tekjuþörf ríkisins, sem var stórskuldugt. Noda var hins vegar andvígur því að hækka skatta á áfengi og tóbak.

Noda var kjörinn leiðtogi Lýðræðisflokksins og forsætisráðherra Japans þegar Naoto Kan sagði af sér í lok ágúst árið 2011. Þegar Noda tók við embætti var stjórnin enn að fást við eyðilegginguna eftir jarðskjálftann og flóðið sem fóru yfir Japan í mars 2011. Enn var mikil hreinsun og uppbygging óunnin vegna hamfaranna og orkuframleiðsla í landinu var illa löskuð vegna sprenginga í kjarnorkuverinu í Fukushima í skjálftanum. Þegar þarna var komið hafði Lýðræðisflokkurinn tapað meirihluta á efri deild japanska þingsins og átti því erfitt með að koma málum sínum í gegn.

Sem forsætisráðherra lét Noda hækka vöruskatta í landinu, sem varð honum til mikilla óvinsælda og leiddi til þess að þrír fyrrverandi ráðherrar lýstu yfir framboði gegn honum í formannskjöri Lýðræðisflokksins.

Noda lét endurræsa tvo af 50 kjarnorkuofnum Japans í júní 2012. Kjarnorkuverunum hafði verið lokað eftir kjarnorkuslysið í Fukushima en Noda sagði japanskt þjóðfélag ekki geta lifað af ef verin yrðu öll höfð í biðstöðu.

Noda lét rjúfa þing og boða til þingkosninga í nóvember 2012. Í kosningunum tapaði Lýðræðisflokkurinn illa fyrir Frjálslynda lýðræðisflokknum undir forystu Shinzō Abe. Noda viðurkenndi ósigur og sagði í kjölfarið af sér sem leiðtogi Lýðræðisflokksins.

Noda hefur áfram verið virkur í japönskum stjórnmálum eftir að hann lét af embætti forsætisráðherra. Í september 2024 var hann kjörinn leiðtogi Stjórnarskrárbundna lýðræðisflokksins, eins af arftökum Lýðræðisflokksins. Flokkurinn bætti við sig miklu fylgi undir forystu Noda í þingkosningum árið 2025. Þegar japanska þingið kaus um forsætisráðherra eftir þingkosningarnar tapaði Noda fyrir Shigeru Ishiba, leiðtoga Frjálslynda lýðræðisflokksins.

Tilvísanir

Fyrirrennari: Naoto Kan

Forsætisráðherra Japans (2. september 2011 – 26. desember 2012)

Eftirmaður: Shinzō Abe

  Þetta æviágrip sem tengist stjórnmálum og Japan er stubbur. Þú getur hjálpað til með því að bæta við greinina.