Vesturgata 2

Vesturgata 2, Bryggjuhúsið - einnig kallað Kaffi Reykjavík er íslenskt hús sem stendur við Vesturgötu í Reykjavík. Númeraröð allra húsa í borginni reiknast út frá húsinu, sem stundum er rætt um sem hlið Reykjavíkur.

Saga

Bryggjuhúsið var reist árið 1862 af C.P.A. Kock, umsjónarmanni póstferða til Íslands og síðar stofnanda Sameinaða danska gufuskipafélagsins. Húsið var reist við norðurenda Aðalstrætis upp af einni aðalbryggju bæjarins. Kvöð var sett á byggingarleyfið að opið og frjálst aðgengi yrði að bryggjunni og var því opið port í gegnum húsið mitt og varð það því í huga margra eins konar borgarhlið.

Þegar farið var að númera hús í Reykjavík var ákveðið að skilgreina Vesturgötu 2 sem miðpunkt bæjarins og hús talin frá Bryggjuhúsinu, með jafnar tölur á hægri hönd en oddatölur til vinstri.

Sameinaða gufuskipafélagið eignaðist hluta af húsinu og bryggjunni norðan við það fyrir starfsemi sína árið 1870. Tíu árum síðar eignaðist Fischer kaupmaður, sem rak verslun sína handan götunnar í Aðalstræti 2, húsið og þaðan komst það í eigu Duus-verslunar árið 1904.

Árið 1927 festi innflutningsfyrirtækið Nathan & Olsen kaup á Bryggjuhúsinu og lét hækka það svo það varð tvílyft eftir. Af öðrum fyrirtækjum sem starfrækt hafa verið í húsinu má nefna útsölu ÁTVR og veitinga- og öldurhúsið Kaffi Reykjavík sem starfaði þar um langt árabil.