Verkalýðsfélag Vestfirðinga
Verkalýðsfélag Vestfirðinga, stytt í Verk Vest, er stéttarfélag verkafólks, verslunarfólks, sjómanna og iðnaðarmanna á Vestfjörðum. Verk Vest tók til starfa 1. janúar 2002 með sameiningu 6 verkalýðsfélaga á Vestfjörðum.[1] Næstu ár bættust fleiri verkalýðsfélög á Vestfjörðum í hópinn og nær starfssvæði félagsins frá Hólmavík og Drangsnesi kringum Vestfirði allt til Reykhólasveitar (utan Bolungarvíkur).
Stofnun félagsins
[breyta | breyta frumkóða]Félögin sem stóðu að stofnun Verk Vest árið 2002 voru þessi: Verkalýðsfélagið Baldur á Ísafirði, Verkalýðs- og sjómannafélag Álftfirðinga í Súðavík, Verkalýðsfélag Hólmavíkur, Verkalýðsfélagið Skjöldur á Flateyri, Verkalýðsfélagið Brynja á Þingeyri og Verkalýðsfélagið Vörn á Bíldudal.
Formlegur stofnfundur félagsins var haldinn í Alþýðuhúsinu á Ísafirði 21. sept. 2002 og höfðu þá 3 félög til viðbótar slegist í hópinn, Verkalýðsfélag Patreksfjarðar, Sveinafélag byggingamanna á Ísafirði og Verslunarmannafélag Ísafjarðar.[2]
Á næstu árum bættust fleiri verkalýðsfélög á Vestfjörðum í hópinn: Verkalýðs- og sjómannafélag Tálknafjarðar, Verkalýðs- og sjómannafélagið Súgandi, Verkalýðs- og sjómannafélag Kaldrananeshrepps, Drangsnesi, Verkalýðs- og sjómannafélagið Grettir á Reykhólum og Sjómannafélag Ísfirðinga. Félagið nær til allra sveitarfélaga á Vestfjörðum, utan Bolungarvíkur. Þó eru verslunarmenn í Bolungvarvík meðlimir Verk Vest.
Verkalýðsfélag Vestfirðinga er aðili að Alþýðusambandi Íslands gegnum sérsambönd þess, Starfsgreinasamband Íslands, Landssamband íslenskra verslunarmanna, Sjómannasamband Íslands og Samiðn.
Starfsemi félagsins
[breyta | breyta frumkóða]Verk Vest starfrækir skrifstofur á Ísafirði og Patreksfirði. Skrifstofa félagsins þjónar jafnframt félagsmönnum Félags járniðnaðarmanna á Ísafirði (með þjónustusamningi við Verk Vest). Verk Vest á orlofshús við Flókalund í Vatnsfirði á Barðaströnd, að Svignaskarði í Borgarfirði, í Ölfusborgum við Hveragerði, á Illugastöðum í Fnjóskadal og á Einarsstöðum á Héraði. Orlofssjóður félagsins ræður auk þess yfir íbúðum í Kópavogi og Akureyri til afnota fyrir félagsmenn.
Verkalýðsfélag Vestfirðinga er eigandi Alþýðuhússins á Ísafirði sem byggt var 1934-1935. Þar er Ísafjarðarbíó til húsa.
Fyrsti formaður Verkalýðsfélags Vestfirðinga var Pétur Sigurðsson (1931-2017), sem jafnframt var forseti Alþýðusambands Vestfjarða. Árið 2007 tók við formennsku í félaginu Finnbogi Sveinbjörnsson.[3]
Stjórn félagsins og nefndir 2025 - 2027
[breyta | breyta frumkóða]Félagsstjórn: Formaður: Finnbogi Sveinbjörnsson Hnífsdal, varaformaður: Bergvin Eyþórsson Selfossi, ritari: Guðrún S. Matthíasdóttir Ísafirði, gjaldkeri: Kolbrún Sverrisdóttir Ísafirði. Til vara: Guðfinna B. Guðmundsdóttir Ísafirði, Artur Blazej Kowalczyk Reykhólahreppi, Ólafur Baldursson Ísafirði, Ómar Sigurðsson Spáni. Verslunardeild: Margrét J. Birkisdóttir – formaður. Sjómannadeild: Sævar Gestsson – formaður. Iðnaðardeild: Ingvar Þór Þorbergsson – formaður. Matvæla- og þjónustudeild:Gunnhildur B. Elíasdóttir Þingeyri – formaður. Opinber deild starfsmanna sveitafélaga og ríkisstofnana: Hlynur S. Kristjánsson – formaður.[4]