Verkalýðs- og sjómannafélag Hnífsdælinga

Verkalýðs- og sjómannafélag Hnífsdælinga var stofnað árið 1924 í Hnífsdal við Ísafjarðardjúp. Félagssvæðið var Eyrarhreppur í Norður-Ísafjarðarsýslu. Félagið starfaði til ársins 1971, þegar það sameinaðist Verkalýðsfélaginu Baldri, Ísafirði, eftir að Ísafjarðarkaupstaður og Eyrarhreppur sameinuðustu árið 1970. Sjómenn í Hnífsdal gengu þá í Sjómannafélag Ísfirðinga.

Félagið var stofnað 24. desember 1924. Fyrsti formaður þess var Ingimar Bjarnason skipstjóri. Með honum voru í fyrstu stjórn Magnús Guðmundsson vélstjóri, ritari og Sigurjón Jónsson frá Djúpadal, féhirðir. Aðal hvatamaður að stofnun félagsins var Finnur Jónsson formaður Verkalýðsfélagsins Baldur á Ísafirði, síðar alþingismaður og ráðherra. Skráðir stofnendur voru 37 verkamenn og konur í Hnífsdal.

Lengst hafa verið formenn félagsins Helgi Björnsson 13 ár og Ingimar Bjarnason 11 ár, en í stjórn þess var hann í 24 ár. Í Alþýðusambandið gekk félagið 28. mars 1931.

Verkfall í Hnífsdal árið 1927

Verkalýðsfélag Hnífsdælinga, eins og félagið hét í fyrstu, háði harða verkfallsbaráttu fyrir tilveru sinni vorið 1927, til þess að ná fram viðukenningu atvinnurekenda í Hnífsdal og samningsrétti gagnvart atvinnurekendum. Útgerðarmenn og fiskverkendur í Hnífsdal gengu hart fram og létu loka verslunum sínum til að ekki næðist í nauðþurftir. Jafnaðarmenn á Ísafirði, verkalýðsfélög og Kaupfélag Ísfirðinga studdu verkafólk í Hnífsdal í deilunni sem lauk með sigri verkalýðsfélagsins.

Verkalýðsfélag Hnífsdælinga var meðal stofnfélaga Alþýðusambands Vestfjarða 1927 og gekk í Alþýðusamband Íslands 28. mars 1931.

Heimildir

• Verkalýðs- og sjómannafélag Hnífsdælinga. Vinnan, afmælishefti, 1966, bls. 56-57.
• Sigurður Pétursson. (2011). Vindur í seglum. Saga verkalýðshreyfingar á Vestfjörðum 1. bindi, 1890-1930.
• Sigurður Pétursson. (2015). Vindur í seglum III. Saga verkalýðshreyfingar á Vestfjörðum 3. bindi, Ísafjörður og Ísafjarðardjúp 1931-1970.