Víg í sjónmáli
Víg í sjónmáli (enska: A View to a Kill) er bresk njósnamynd frá 1985 og fjórtánda James Bond-myndin sem Eon Productions framleiddu. Þetta var líka sjöunda og síðasta skiptið sem Roger Moore lék aðalhlutverkið. Titill myndarinnar var fenginn úr smásögu eftir Ian Fleming, „From a view to a kill“, en sagan var frumsamin. Handritið var skrifað af Michael G. Wilson og Richard Maibaum. Þetta var þriðja myndin sem John Glen leikstýrði og sú síðasta þar sem Lois Maxwell fór með hlutverk Miss Moneypenny.
Upphafsatriði myndarinnar, sem á að gerast í Síberíu, var tekið á Jökulsárlóni á Íslandi.[1] James Bond endurheimtir þar örgjörva og kemst naumlega undan mönnum sovésku öryggislögreglunnar KGB. Í ljós kemur að örgjörvar framleiddir af Zorin Industries fyrir bresk öryggiskerfi, eru nákvæmlega eins og sovéskir örgjörvar. Böndin berast að eiganda fyrirtækisins, Max Zorin (Christopher Walken). Bond dulbýr sig sem hrossaræktanda sem hyggst kaupa veðhlaupahest af Zorin. Zorin og handbendi hans May Day (Grace Jones) sjá í gegnum dulargervið og telja sig hafa drepið Bond. Bond eltir þau til San Francisco þar sem hann kemst að áætlun þeirra um að koma af stað jarðskjálfta til að eyða Silicon Valley, svo Zorin sitji einn að örgjörvamarkaðnum. Með aðstoð jarðfræðingsins Stacey Sutton (Tanya Roberts) tekst Bond að forða sprengingunni og sigra Zorin eftir átök á Golden Gate-brúnni.
Myndin fékk almennt fremur slæma dóma. Gagnrýnendur töluðu um aldur Moore (fæddur 1927), sem var 20 árum eldri en „Bondstúlkurnar“ Jones og Roberts (fæddar 1948 og 1949).[2] Moore sagði sjálfur að þetta væri sú mynd sem hann var síst ánægður með.[3] Honum þótti meðal annars vandræðalegt að vera eldri en móðir Roberts. Myndin gekk samt mjög vel í kvikmyndahúsum og náði 152,4 milljón dala tekjum á heimsvísu.[4] Titillagið, flutt af bresku hljómsveitinni Duran Duran, var fyrsta Bondlagið sem náði í fyrsta sæti á Billboard Hot 100-listanum.[5] Myndin var frumsýnd í San Francisco 22. maí. Á Íslandi var Norðurlandafrumsýning á myndinni 27. júní sama ár, í Bíóhöllinni í Mjódd, en fyrri Bondmyndir voru flestar sýndar í Tónabíói. Ágóðinn af frumsýningunni rann til Sólheima.[6]
Tilvísanir
[breyta | breyta frumkóða]- ↑ Vilborg Einarsdóttir (1. júlí 1984). „Ísjakinn sjaldnast þar að morgni sem skilið var við hann að kvöldi“. Morgunblaðið. bls. 36-37.
- ↑ Attanasio, Paul (24 maí 1985). „As Bond, Moore Is Less“. The Washington Post. Washington, D.C. bls. B47.
- ↑ Barnes, Alan; Hearn, Marcus (1997). Kiss Kiss Bang! Bang!: the Unofficial James Bond Film Companion. Batsford Books. bls. 169. ISBN 978-0-7134-8182-2.
- ↑ „A View to a Kill: MI6 Profile“. Afrit af uppruna á 1 nóvember 2011. Sótt 6. september 2007.
- ↑ „A View to a Kill“. MI6-HQ.com. Afrit af uppruna á 29. mars 2012. Sótt 7. september 2007.
- ↑ „Víg í sjónmáli“. Morgunblaðið. 16. júní 1985. bls. 26-27.
