Urriðavatn (Garðabær)

Úr Wikipediu, frjálsa alfræðiritinu

Urriðavatn er mjög grunnt vatn vestan Urriðaholts í Garðabæ. Vatnið er einnig nefnt Urriðakotsvatn eða Urriðakotstjörn. Urriðavatn myndaðist fyrir um 7300 árum þegar Búrfellshraun rann og hraun rann inn í dalverpi til móts við Urriðakot og stíflaði vatnið. Flatarmál vatnsins er um 13 hektarar, meðaldýpt þess er 0,70 m og mesta dýpi 0,90 m. Hæð þess yfir sjávarmáli er 29-30 m. Urriðavatn og aðliggjandi hrauðjaðar og votlendi er á náttúruminjaskrá. Vatn sem berst í Urriðavatn er að mestu leyti að uppruna yfirborðsvatn sem berst frá um 2 ferkílómetra vatnasviði í kringum vatnið. Innstreymi í vatnið kemur úr lindum í votlendinu kringum vatnið og tveimur lækjum sem falla í vatnið að sunnaverðu. Afrennsli úr vatninu er að mestu um Stórakrókslæk (Kaplakrikalæk) en auk þessu sígur grunnvatn úr vatninu gegnum hraunið fyrir norðan það. Árið 1973 eða 1974 var mannhæðarháum garði ýtt upp við útfall vatnsins og Stórakrókslækur settur í steyptan stokk.

Mikil gróska er í rótföstum háplöntum á botni vatnsins og síkjamari (Myriophyllum alterniflorum) þar allsráðandi en einnig er þar fjallnykra (Potamogeton alpinus) og þráðnykra (Potamogeton filiformis). Í vatninu eru tvær fisktegundir urriði og hornsíli. Mikið fuglalíf er við vatnið. Yfir 20 tegundir fugla hafa reglulega búsetu við vatnið eða hafa sést þar öðru hvoru. Flórgoði verpir stundum á vatninu.

Heimildir[breyta | breyta frumkóða]