Timothy Dalton
Timothy Leonard Dalton Leggett (f. 21. mars 1946) er breskur leikari sem er einna þekktastur fyrir að leika James Bond í kvikmyndunum Logandi hræddir (1987) og Leyfið afturkallað (1989).
Líkt og fyrirrennari hans í hlutverki Bonds, Roger Moore, var Dalton frægur áður en hann tók að sér hlutverkið. Hann hafði leikið í sögulegum stórmyndum á borð við Ljónið í vetrarham (Lion in Winter - 1968), Fýkur yfir hæðir (Wuthering Heights - 1970), Cromwell (1970), María Skotadrottning (1971), í sjónvarpsþáttunum Jane Eyre (1983) og hryllingsmyndinni The Doctor and the Devils (1985). Hann var auk þess þekktur sviðsleikari og hafði komið fram með Royal Shakespeare Company.[1]
Dalton var fyrst boðið hlutverk Bonds eftir að Connery sagði sig frá því, en hann hafnaði því af því honum þótti hann sjálfur of ungur.[2] Eftir að Roger Moore sagði sig frá hlutverkinu komu framleiðendur aftur að máli við hann, en hann var upptekinn að leika í ævintýramyndinni Brenda Starr. Pierce Brosnan var þá boðið hlutverkið, en samningar gengu ekki, og eftir þessar tafir gat Dalton tekið hlutverkið að sér.[3] Fyrri Bondmyndin fékk góða dóma og gekk fádæma vel í kvikmyndahúsum, en sú seinni gekk mun verr, sérstaklega í Bandaríkjunum. Til stóð að gera þriðju myndina, en málaferli milli UA/MGM og Danjaq (eignarhaldsfélags Bondmyndanna) töfðu framleiðsluna um fjögur ár.[4] Þá var samningurinn við Dalton útrunninn og hann ákvað að draga sig í hlé.[5]
Eftir Bond hefur Dalton tekið að sér fjölbreytt hlutverk í sjónvarpi og kvikmyndum og fengist við talsetningu, meðal annars í Leikfangasögu 4.
Tilvísanir
[breyta | breyta frumkóða]- ↑ „Timothy Dalton – Shakespearean James Bond“. Afritað af uppruna á 10 júní 2013. Sótt 28 júní 2012.
- ↑ Good Morning America – interview with Timothy Dalton – 1987. YouTube. Sótt 5 apríl 2016.
- ↑ Broccoli, Albert R.; Zec, Donald (1998). When the Snow Melts:The Autobiography of Cubby Broccoli. London, UK: Boxtree. ISBN 978-0-7522-1162-6.
- ↑ „MI6 :: The Home of James Bond“. Afrit af uppruna á 28. mars 2022. Sótt 11. desember 2006.
- ↑ „James Bond 007 :: MI6 – the Home of James Bond“. Afritað af uppruna á 4. mars 2006. Sótt 18 febrúar 2007.
