Syðridalsvatn

Úr Wikipediu, frjálsa alfræðiritinu
Jump to navigation Jump to search

Syðridalsvatn eða Miðdalsvatn er vatn í Syðridal í Bolungarvík. Frá Djúpvegi að vatninu og meðfram því austanmegin liggur Syðridalsvegur eða þjóðvegur nr. 629 Enginn vegur liggur vestan megin við vatnið. Þrír bæir eru í byggð austanmegin við vatnið en það eru Geirastaðir, Miðdalur og Hanhóll. Fornar sagnir herma að á bakka vatnsins hafi bær Völusteins staðið. Landnámsmaðurinn Þuríður sundafyllir nam Bolungarvík og bjó að Vatnsnesi sem var þar sem Ósá rennur út úr vatninu til sjávar. Hún deildi við bróður sinn og urðu þau bæði að steinum. Silungsveiði er í vatninu.

Syðridalsvatn er um 1 km² og liggur í 3 h.y.s. og er 1,7 km langt og 0,7 km breitt. Bakkar vatnsins eru lágir og vel grónir. Syðridalsvatn er grunnt og frjósamt og er dýpi vatnsins er víða 0,5 til 1 m. Botninn er leir eða leðjukenndur. Í Syðridalsá falla ár og lækir úr fjöllunum í kringum vatnið en þær helstu eru Gilsá, Tröllá og Selá. Þær ár eru aðeins fiskgengar skammt upp. Ósá á svo upptök sín í Syðridalsvatni og rennur um 2 km leið austan við þorpið í Bolungarvík. Áin er 10-12 m breið. Vatnasvið Ósár er um 35 ferkílómetrar. Allar tegundir íslenskra ferskvatnsfiska er að finna í vatninu og í Ósá en bleikja bæði staðbundin og sjógengin er ríkjandi tegund. Innrennslisárnar í Syðridalsvatn eru kaldar og henta vel bleikju. Einnig er í vatninu urriði og áll. Mikið er um hornsíli en það er aðalfæða bleikjunnar í vatninu.

Heimild[breyta | breyta frumkóða]