Suður-Gyeongsang-hérað
Suður-Gyeongsang-hérað (kóreska: 경상남도, Gyeongsangnam-do) er hérað í suðausturhluta Suður-Kóreu. Höfuðborg héraðsins er Changwon. Héraðið liggur að stórborgunum Busan og Ulsan.
Suður-Gyeongsang er eitt mikilvægasta iðnaðarsvæði landsins. Þar er öflugur framleiðslu- og þungaiðnaður, þar á meðal skipasmíði, bifreiðaiðnaður og flug- og geimferðaiðnaður. Héraðið stendur fyrir um 43% af allri framleiðslu flug- og geimferðaiðnaðar Suður-Kóreu og þar eru fyrirtækin Korea Aerospace Industries og Hanwha Aerospace með starfsemi. Alls eru um 125 iðnaðarsvæði í héraðinu, og er nú verið að byggja upp geimferðamiðstöð.[1]
Skipasmíðaiðnaður er sérstaklega áberandi í borginni Geoje. Skipasmíðastöðvar Geoje teljast meðal þeirra stærstu í heiminum og þar starfa alþjóðleg skipasmíðafyrirtæki á borð við Samsung Heavy Industries.[2]
Náttúra héraðsins er fjölbreytt, með fjöllum, frjósömum dölum og langri strandlengju með fjölmörgum eyjum. Hluti Jirisan-þjóðgarðsies liggur innan héraðsins og er vinsæll áfangastaður ferðamanna. Íbúar Suður-Gyeongsang-héraðs eru um 3,3 milljónir, sem gerir það að einu fjölmennasta héraði Suður-Kóreu.[3]