Straumsvík

Úr Wikipediu, frjálsa alfræðiritinu
Jump to navigation Jump to search
Straumsvík.

Straumsvík er vík í hrauninu rétt sunnan við Hafnarfjörð þar sem bærinn Straumur stendur. Þar er náttúruleg höfn og lendingar þýskra skipa á miðöldum. Þar stóð til að koma upp norskri hvalveiðistöð í upphafi 20. aldar. Bjarni Bjarnason skólastjóri í Hafnarfirði rak stórt býli á Straumi á millistríðsárunum þar til hann fluttist að Laugarvatni. Árið 1964 var víkin valin fyrir álverksmiðju Alusuisse í tengslum við nýtt raforkuver, Búrfellsvirkjun. Íslenska ríkið stóð þá að gerð iðnaðarhafnar í Straumsvík fyrir verksmiðjuna. Álverið í Straumsvík hóf starfsemi þar árið 1969.

Þarna eru miklar lindir við ströndina, svokallaðar fjörulindir, sem sjást best þegar lágsjávað er en þá flæðir vatnið um þröng hraunsund út í víkina. Á flóði fara lindirnar á kaf og lítil ummerki sjást þá um hið mikla ferskvatnsrennsli. Talið er að um 4000 l/s streymi þarna að jafnaði til sjávar. Mikið er um krækling í Straumsvík og töluvert fuglalíf. Þar finnst einnig sjaldgæft afbrigði af bleikju, dvergbleikja, sem þarna lifir í hraungjótum á mörkum ferskvatns og sjávar.

Wiki letter w.svg  Þessi grein er stubbur. Þú getur hjálpað til með því að bæta við greinina.