Snorri Sigfús Birgisson
Snorri Sigfús Birgisson (f. 29. apríl 1954) er íslenskt tónskáld og píanóleikari. Hann er eitt af leiðandi tónskáldum sinnar kynslóðar á Íslandi og hefur hlotið margvíslegar viðurkenningar fyrir störf sín að tónlist.
Æviágrip
[breyta | breyta frumkóða]Snorri Sigfús hóf tónlistarnám hjá Gunnari Sigurgeirssyni og hélt áfram námi við Tónlistarskólann í Reykjavík, þar sem Hermína Kristjánsson, Jón Nordal, Árni Kristjánsson og Þorkell Sigurbjörnsson voru meðal kennara hans. Hann stundaði framhaldsnám í píanóleik hjá Barry Snyder við Eastman-tónlistarskólann í Bandaríkjunum (1974–1975) og tónsmíðar hjá Finn Mortensen í Noregi (1975–1976). Hann fluttist til Amsterdam árið 1976 og nam tónsmíðar hjá Ton de Leeuw um tveggja ára skeið.[1]
Snorri Sigfús hefur verið búsettur í Reykjavík frá árinu 1980. Hann hefur kennt víða, meðal annars við Tónlistarskólann í Reykjavík, og er meðlimur í tónlistarhópnum CAPUT. Hann hefur samið fjölda tónverka, meðal annars einleiks- og kammerverk, hljómsveitarverk og kórverk. Hann hefur einnig útsett fjölda íslenskra þjóðlaga, meðal annars fyrir einleikspíanó. Snorri hefur sjálfur gefið út flutning sinn á þjóðlagaútsetningum sínum (Hear Now My Heart, 2007) auk þess að flytja flokkinn Portrett fyrir píanó á geislaplötu (1998). Meðal þeirra sem hafa flutt verk hans má nefna Víking Heiðar Ólafsson, Sinfóníuhljómsveit Íslands, Sinfóníuhljómsveit Norðurlands og Hamrahlíðarkórinn.
Árið 1997 frumflutti Snorri nýjan píanókonsert sinn með Sinfóníuhljómsveit Norðurlands og var hann tilnefndur til Tónskáldaverðlauna Norðurlandaráðs ári síðar.[2] Hann hlaut Íslensku tónlistarverðlaunin 2025 fyrir verkið Konsert nr. 2 fyrir hljómsveit.[3] Eldra verk hans, Konsert fyrir hljómsveit, var tilnefnt til sömu verðlauna árið 2021.[4]
Tónverk (úrval)
[breyta | breyta frumkóða]- Hymni fyrir strengjasveit (1982)
- Coniunctio fyrir hljómsveit (1994)
- Afmorsvísa (texti: Páll Vídalín, 1994)
- Píanókonsert (1996)
- Sjö portrett fyrir píanó (1997–1998)
- Vitringarnir frá Austurlöndum fyrir blandaðan kór (texti: Heinrich Heine/Helgi Hálfdanarson, 2000)
- Strengjakvartett nr. 3 (2004)
- Píanókonsert nr. 2 (2007)
- Konsert fyrir hljómsveit (2013–2015)
- Svíta fyrir einleiksfiðlu (2020)
- Konsert nr. 2 fyrir hljómsveit (2024)
Tenglar
[breyta | breyta frumkóða]Heimasíða Snorra Sigfúsar Birgissonar
Tónverk hjá Íslenskri tónlistarmiðstöð.
Tilvísanir
[breyta | breyta frumkóða]- ↑ „Snorri Sigfús Birgisson“. Naxos. Sótt desember 2025.
- ↑ „Snorri Sigfús Birgisson“. Íslensk tónlistarmiðstöð. Sótt desember 2025.
- ↑ „The Icelandic Music Awards 2025 - Nominations and Winners“. Íslensk tónlistarmiðstöð. apríl 2025. Sótt desember 2025.
- ↑ „Íslensku tónlistarverðlaunin - tilnefningar!“. Nútíminn. mars 2021. Sótt desember 2025.