Snjóflóðið á Flateyri
Snjóflóðið á Flateyri er snjóflóð sem féll þann 26. október árið 1995 á bæinn Flateyri í Önundarfirði með þeim afleiðingum að 20 manns fórust en 25 björguðust. Tíu karlar, sex konur og fjögur börn létust í flóðinu sem varð rétt eftir 4 um nóttina. [1] Flóðið kom úr Skollahvilft í Eyrarfjalli en í fjallinu ofan bæjarins eru tvö gil, Innra-Bæjargil og Skollahvilft. Það féll á innanverðan bæinn og eyðilagði eða hreif með sér 17 hús við göturnar Ólafstún, Hjallaveg, Tjarnargötu og Unnarstíg. [2] Snjóflóðið kom aðeins 9 mánuðum eftir snjóflóðið í Súðavík sem varð í janúar sama ár.
Stjórnstöð Almannavarna var virkjuð og tiltækt lið var kallað út. Björgunarsveitir frá Ísafirði voru komnar til bæjarins 9 um morguninn en þá höfðu íbúar verið hjálparlausir í fimm klukkustundir. [3] Tvær þyrlur Landhelgisgæslunnar, Líf og Sif og tvær þyrlur varnarliðsins fóru á staðinn og lentu um hádegi. Varðskipin Ægir og Óðinn komu undir kvöld. [4]
Eftir flóðið voru reistir snjóflóðavarnargarðar ofan við bæinn. Minnisvarði um þá sem fórust var reistur skammt frá enda flóðsins við Flateyrarkirkju.
Gagnrýnt hefur verið að rannsóknarnefnd hafi ekki gert skýrslu um flóðið líkt og um Súðavíkurflóðið [5].
Tengt efni
[breyta | breyta frumkóða]Tilvísanir
[breyta | breyta frumkóða]- ↑ Morgunblaðið, 27. október 1995
- ↑ 27 ár liðin frá einu mannskæðasta snjóflóði Íslandssögunnar: „9 eða 10 manns sem voru að heiman“ Mannlíf
- ↑ „Okkur er orða vant, Íslendingum öllum“ – 30 ár síðan 20 fórust í snjóflóði á Flateyri Rúv, sótt 26. október 2025
- ↑ Alþýðublaðið 27. október 1995
- ↑ „Af hverju er ég yfirhöfuð hingað komin?“ Rúv, sótt 4. júní 2026