Skipstrjóna
Skipstrjóna er framsett þilfar fremst á (sögulegu) seglskipi undir bugspjótinu. Skipstrjónan var vinnupallur fyrir þá sjómenn sem fengust við framsegl skipsins á og undir bugspjótinu. Skipstrjónur einkenndu stærri seglskip frá 16. öld til 18. aldar. Skipstrjónur gátu verið mikið skreyttar með myndskurði, sérstaklega á barokktímabilinu á 17. öld. Skipstrjónan er einkum tengd við skipsgerðina galíon og dregur nafn sitt af henni í sumum tungumálum.
Undir skipstrjónunni gat verið útskorið stafnlíkan. Á trjónunni gátu líka verið klósettstokkar þar sem sjómenn gengu örna sinna. Enska orðið yfir skipsklósett, head, er dregið af enska orðinu yfir skipstrjónu, beakhead.[1]
