Skátar (hljómsveit)

Skátar er hljómsveit sem var stofnuð árið 2000, til skamms tíma hét hljómsveitin Egyptarnir en var nafninu fljótlega breytt í Þessir Andskotans Skátar og svo endanlega í Skátar. Skátar var stofnuð af Aðalsteini Möller og Pétri Má Guðmundssyni sem fengu til liðs við sig þá Agnar Diego og Benedikt Reynisson. Aðalsteinn heltist fljótlega úr lestinni þar sem hann vildi setja meiri athygli og orku í hljómsveit sína Graveslime. Agnar Diego sagði skilið við hljómsveitina árið 2001 og inn í hljómsveitina komu þeir Björn Kolbeinsson á rafbassa sem hafði áður spilað með anarcho-punk- og thrash-sveitunum Petrograd og Boltrope í Luxemborg og Gestur Guðnason rafgítarleikari sem einnig spilaði með Stórsveit Nix Noltes, Atónal Blús og Númer Núll en hann yfirgaf hljómsveitina árið 2003 og í hans stað kom Ólafur Steinsson (Graveslime, Rollan, Skorpin tunga o.fl.) sem hafði verið að spila með þeim í afleysingum á trommur og rafbassa. Skátar fóru í gegnum margar söngvaraprufur og fyrst til að syngja með þeim var söngkonan Rán Bjargardóttir sem söng aðeins á fyrstu tónleikum sveitarinnar ásamt Ólafi Guðstein Kristjánssyni úr Örkuml og Hanoi Jane. Ólafur sagði skilið við Skáta árið 2004 og hans síðasta verk með Skátum var að syngja inn á fyrstu útgáfu þeirra er sex laga skífan Heimsfriður í Chile: Hverju skal breyta, bæta við og laga. Skífan kom út undir merkjum Grandmothers Records sem í fyrstu var notað til að gefa út fyrstu breiðskífu Sofandi og síðar Graveslime og Retrön.

Við stöðu Ólafs tók Markús Bjarnason sem var góðvinur Skáta-meðlima og hafði getið sér gott orð sem söngvari og lagahöfundur í hljómsveitunum Sofandi og Campfire Backtracks. Markús setti strax sín kennileiti á hljómsveitina og lagasmíðar sem áttu eftir að koma út á næstu stóru skífu Skáta. Árin 2005 og 2006 fór að mestu leyti í lagasmíðar og að fylgja eftir Heimsfrið í Chile og komu þeir fram á hátíðum á borð við Iceland Airwaves, Aldrei fór ég suður, Innipúkanum og Reykjavík Trópik. Skátar fóru í tónleikaferðir til Englands og Belgíu þar sem þeir komu fram í boði Moshi Moshi Music, Drowned In Sound, John Kennedy á XFM London sem valdi "Halldór Ásgrímsson" sem lag vikunnar í þætti sínum X-Posure with John Kennedy. Í tónleikaferðum spiluðu þeir með ensku neðanjarðarsveitinni I'm Being Good og fyrir náttúruverndarsamtökin Saving Iceland ásamt Stilluppsteypu, Disco Shrimp og Berglindi Ágústsdóttur. Ólafur Steinsson helltist úr lestinni árið 2006 þegar hann fluttist til Berkeley í Kaliforníu og hafði lokið við að leggja sitt á vogaskálarnar við gerð Ghost of the Bollocks to Come sem kom út í apríl 2007. Gylfi Blöndal (kimono, Hudson Wayne, Mr. Silla) hljóp í skarðið með hljómsveitinni á nokkrum tónleikum árið 2006 en var svo leystur af hólmi þegar Kolbeinn Hugi Höskuldsson gekk til liðs við Skáta árið 2007.

Skátar voru þekktir fyrir framkomu í hvítum göllum sem stundum eru kallaðir sæðisfrumugallar en eru í raun taldir vera einhvers konar rykvarnarvinnugallar. Einnig áttu þeir til að koma fram í gylltum spandex-buxum.

Skátar komu fram á fjöldanum öllum af tónleikum, tónlistarhátíðum og myndlistarsýningum á árunum 2004 til 2009 þegar þeir lögðust í dvala. Sökum flókinna lagasmíða hlaut sveitin ekki mikla dagspilun í útvarpi en hlaut þau þónokkurrar hylli á Rás 2 og Xinu 977 ásamt því að vera spilaðir á BBC, KEXP og á XFM London þar sem þeir áttu lag vikunnar hjá John Kennedy (Halldór Ásgrímsson af Heimsfriður í Chile) Þeir snéru aftur árið 2013 til heiðra minningu Björns Kolbeinssonar sem lést af slysförum 28. desember 2012. Skátar komu aftur saman árið 2018 og spiluðu á tónlistarhátíðinni Norðanpaunk við Laugarbakka

Meðlimir

Ólafur Guðsteinn Kristjánsson - söngur (2003-2004)
Gestur Guðnason - rafgítar (2002-2003)
Pétur Már Guðmundsson - trommur (2000-dagsins í dag)
Björn Kolbeinsson - rafassi, rafgítar, söngur (2001-2009)
Benedikt Reynisson - rafgítar, útvarp, hljómborð (2000-dagsins í dag)
Gylfi Blöndal - rafgítar (2006)
Markús Bjarnason - söngur, hljómborð, rafbassi, rafgítar og viðbótarslagverk (2004-dagsins í dag)
Kolbeinn Hugi Höskuldsson - rafgítar, söngur, hljómborð (2007-2013)
Agnar Diego - rafgítar, rafbassi (2000-2001)
Aðalsteinn Möller - rafgítar (2000-2001)
Ólafur Steinsson - rafgítar, rafbassi, bakraddir (2003-2006)
Rán Bjargardóttir - söngur (2003)
Rúnar Örn Marinósson - trommur (2020-2021)
Sturla Sigurðarson - rafbassi, rafgítar (2018-dagsins í dag)
Óðinn Dagur Bjarnason - rafgítar (2018)

Útgefin verk

Heimsfriður í Chile: Hverju skal breyta, bæta og laga 2004, Grandmothers Records
Skrew The Elves, Fokk The System, 2005, Salómon Recordings
Live at Iceland Airwaves, 2005, Grandmothers Records
Ghost of the Bollocks to Come, 2007, Grandmothers Records
Goth Báðum Megin, 2009, Grandmothers Records
Heimsfriður í Chile: Hverju skal breyta, bæta við og laga (2025 Mastered Edition), 2025, Grandmothers Records

Tenglar