Segðu aldrei aftur aldrei
_right_National_Motor_Museum,_Beaulieu.jpg)
Segðu aldrei aftur aldrei (enska: Never Say Never Again) er James Bond-kvikmynd eftir Irvin Kershner, byggð á skáldsögu Ian Fleming, Thunderball, frá 1961, sem aftur byggist á sögu eftir Kevin McClory, Jack Whittingham, og Fleming. Sagan hafði áður verið kvikmynduð árið 1965 sem Þrumufleygur (Thunderball). Segðu aldrei aftur aldrei var síðasta Bondmyndin sem ekki var framleidd af Eon Productions sem hafa framleitt nánast allar Bondmyndirnar. Þess í stað var fyrirtæki Jack Schwartzman, Taliafilm, framleiðandi og Warner Bros var dreifingaraðili. Gerð myndarinnar byggðist á kvikmyndarétti sem var dæmdur leikstjóranum Kevin McClory í dómsmáli 1963.[1]
Í myndinni lék Sean Connery hlutverk njósnarans James Bond í sjöunda og síðasta skipti, tólf árum eftir að hann lék hlutverkið síðast, í Demantar svíkja aldrei 1971. Titill myndarinnar vísar í þau orð Connery frá 1971 að hann myndi aldrei leika Bond framar. Connery var 52 ára þegar myndin var tekin og því var oft vísað í að njósnarinn hefði elst og væri ekki lengur í blóma lífsins (Connery var raunar þremur árum yngri en Roger Moore sem tók við hlutverkinu af honum hjá Eon). Söguþráður myndarinnar gengur út á að Bond er fenginn til að rannsaka rán glæpasamtakanna SPECTRE á tveimur kjarnorkusprengjum. Myndin var tekin í Frakklandi, á Spáni, Bahamaeyjum og Elstree Studios í Bretlandi.
Warner Bros frumsýndu myndina 7. október 1983. Hún fékk almennt góða dóma og gagnrýnendur fögnuðu endurkomu Connerys. Kvikmyndin gekk vel í kvikmyndahúsum og náði 160 milljón dala tekjum,[2] þótt hún gengi ekki jafn vel og Octopussy sem Eon gaf út fyrr þetta sama ár.[3] Í seinni tíð hefur myndin hins vegar ekki þótt standast samanburð við aðrar Bondmyndir og henni er oft sleppt í formlegum listum yfir Bondmyndir.[4]
Tilvísanir
[breyta | breyta frumkóða]- ↑ Poliakoff, Keith (2000). „License to Copyright – The Ongoing Dispute Over the Ownership of James Bond“ (PDF). Cardozo Arts & Entertainment Law Journal. 18. Benjamin N. Cardozo School of Law: 387–436. Afrit af upprunalegu (PDF) geymt þann 31. mars 2012. Sótt 3. september 2011.
- ↑ „Never Say Never Again“. Nash Information Services, LLC. Afrit af uppruna á 11 ágúst 2011. Sótt 1. september 2011.
- ↑ „Octopussy“. The Numbers. Nash Information Services, LLC. Afrit af uppruna á 7. mars 2014. Sótt 8 ágúst 2011.
- ↑ Norman Wilner. „Rating the Spy Game“. MSN. Afrit af upprunalegu geymt þann 19 janúar 2008. Sótt 4. mars 2008.
