Samúelsbók
Samúelsbók er ein af bókum Hebresku Biblíunnar, en í Sjötíumannaþýðingunni, og þar með í kristna Gamla testamentinu, er henni skipt í tvær bækur (fyrri og síðari Samúelsbók). Seinni tíma fræðimenn líta oftast svo á að Samúelsbók sé hluti af heild, ásamt 5. Mósebók, Jósúabók, Dómarabókinni og Konungabók. Þessar bækur segja sögu Ísraelsmanna og setja hana í ákveðið guðfræðilegt samhengi.[1] Hugsanlega samdi sami höfundur (devterónómistinn) öll fimm ritin milli 630 og 550 f.Kr.[2]
Samkvæmt hefð Gyðinga er spámaðurinn Samúel höfundur Samúelsbókar, með viðbótum frá spámönnunum Gad og Natan.[3] Þetta eru þrír spámenn sem eru nefndir í frásögn Kronikubókar um ríkisár Davíðs.
Bókin hefst á sögu Samúels sem fæðist í valdatíð dómarans Elí. Hann er útvalinn til að heyra orð Jave. Á þeim tíma eiga Ísraelsmenn í átökum við Filistea sem ræna sáttmálsörkinni. Eftir lát Elí biður fólkið um konung og Jave segir Samúel að smyrja Sál sem konung. Sál tekst á við nágrannaþjóðir Ísraelsmanna, einkum Filistea, en guð iðrar að hafa gert hann að konungi og vísar Samúel á Davíð. Davíð sigrar risann Golíat með handslöngvu eina að vopni. Sál óttast Davíð og hrekur hann í útlegð, en að lokum verður Davíð konungur. Samúelsbók segir svo frá ríkisárum Davíðs og endar á því að Davíð kaupir þreskigólfið þar sem Salómon reisir fyrsta musterið í Jerúsalem og flytur sáttmálsörkina þangað.
Tilvísanir
[breyta | breyta frumkóða]- ↑ Gordon, Robert (1986). I & II Samuel, A Commentary. Paternoster Press. ISBN 9780310230229.
- ↑ Knight, Douglas A (1995). „Chapter 4 Deuteronomy and the Deuteronomists“. Í James Luther Mays; David L. Petersen; Kent Harold Richards (ritstjórar). Old Testament Interpretation. T&T Clark. bls. 62. ISBN 9780567292896.
- ↑ Hirsch, Emil G. (1906). Samuel, Books of.
