Leó 14.
| Leó 14. | |
|---|---|
.png) Leó 14. árið 2025. | |
 Páfi | |
Núverandi | |
| Tók við embætti 8. maí 2025 | |
| Forveri | Frans |
| Persónulegar upplýsingar | |
| Fæddur | 14. september 1955 Chicago, Illinois, Bandaríkjunum |
| Þjóðerni | Bandarískur |
| Trúarbrögð | Kaþólskur |
| Háskóli | Villanova University (BS) Catholic Theological Union (MDiv) Angelicum (LCL, DCL) |
| Undirskrift |  |
Leó 14. (latína: Leo XIV; fæddur undir nafninu Robert Francis Prevost 14. september 1955), er núverandi páfi rómversk-kaþólsku kirkjunnar. Hann var kjörinn páfi þann 8. maí árið 2025 í páfakjöri eftir andlát Frans páfa. Leó er fyrsti páfinn frá Bandaríkjunum og jafnframt fyrsti páfinn sem kenndur er við Ágústínusarregluna.
Æviágrip
[breyta | breyta frumkóða]Robert Francis Prevost fæddist í Chicago í Illinois í Bandaríkjunum þann 14. september árið 1955. Faðir hans var af frönskum og ítölskum ættum en móðir hans af spænskum. Prevost nam stærðfræði og heimspeki við Villanova-háskóla í Pennsylvaníu og útskrifaðist með bakkalársgráðu árið 1977. Sama ár og hann útskrifaðist gekk hann í Ágústínunarregluna í Saint Louis, sem var með starf í Chicago. Hann hóf guðfræðinám í kaþólskum skóla í Chicago og fór 27 ára gamall til Rómar til að læra kirkjurétt við Angelicum-háskólann. Árið 1982 tók hann prestsvígslu í Róm.[1]
Prevost fór til Perú sem trúboði í fyrsta sinn árið 1984 á meðan hann vann að doktorsritgerð sinni. Hann varði ritgerð sína þremur árum síðar og var skipaður yfirmaður safnaðarins í Illinois. Hann sneri hins vegar brátt aftur til Perú og vann þar frá 1988 til 1999. Hann sneri aftur til Bandaríkjanna en fór aftur til Perú árið 2013 og var þar til ársins 2023.[1] Frans páfi skipaði Prevost biskup borgarinnar Chiclayo árið 2014 og skipaði hann kardinála í byrjun ársins 2024.[2] Á meðan Provost var erkibiskup í Perú var hann sakaður um að hylma yfir ásakanir um kynferðislega misnotkun, sem biskupsdæmi hans hafnaði því að hafa gert.[3] Provost hlaut perúskan ríkisborgararétt árið 2015.[4]
Árið 2023 kallaði Frans páfi Prevost til Rómar og skipaði hann yfirmann í valnefnd biskupa og höfuðklerka. Í því embætti hafði Prevost umsjón með tilnefningum næstu kynslóðar biskupa.[5] Í því embætti vann Prevost með Frans að því að koma þremur konum í nefndina sem ákveður hvaða biskupstilnefningar eru sendar til páfa.[1] Prevost varð jafnframt forseti ráðgjafanefndar páfa um málefni Suður-Ameríku, sem gerði honum kleift að stofna til tengsla við kaþólska kirkjuhöfðingja í álfunni.[2]
Prevost var kjörinn páfi þann 8. maí árið 2025 eftir andlát Frans. Prevost varð þar með fyrsti bandaríski páfi kaþólsku kirkjunnar.[6][7] Prevost valdi sér páfanafnið Leó, sem var síðast notað af Leó 13. páfa árið 1903. Nafnavalið þótti til marks um í hvaða fótspor Leó 14. hygðist feta, en Leó 13. var frægur fyrir baráttu fyrir ýmsum réttlætis- og jafnréttismálum.[1]
Tilvísanir
[breyta | breyta frumkóða]- ↑ 1,0 1,1 1,2 1,3 Jón Þór Stefánsson (8. maí 2025). „Hvað vitum við um Leó páfa?“. Vísir. Sótt 8. maí 2025.
- ↑ 2,0 2,1 Iðunn Andrésdóttir (8. maí 2025). „Leó XIV: Fyrsti páfinn frá Bandaríkjunum“. RÚV. Sótt 8. maí 2025.
- ↑ „„Mjög góður maður, mjög hlédrægur"“. mbl.is. 8. maí 2025. Sótt 8. maí 2025.
- ↑ Björn Bjarnason (8. maí 2025). „Bandaríkjamaður kjörinn páfi – Leó XIV“. Varðberg. Sótt 11. maí 2025.
- ↑ „Fagnar reynslumiklum páfa“. mbl.is. 8. maí 2025. Sótt 8. maí 2025.
- ↑ „Nýr páfi er frá Bandaríkjunum“. mbl.is. 8. maí 2025. Sótt 8. maí 2025.
- ↑ Valur Grettisson (8. maí 2025). „Fyrsti páfinn frá Bandaríkjunum“. Heimildin. Sótt 8. maí 2025.
| Fyrirrennari: Frans |
|
Eftirmaður: Enn í embætti | |||
