Rituættkvísl eða ritur er ættkvísl fugla af máfaætt. Ættkvíslin inniheldur tvær tegundir, hina almennu ritu (Rissa tridactyla) sem finnst meðal annars á Íslandi
og rauðfættu rituna (Rissa brevirostris). Rauðfætta ritan er nefstyttri en sú íslenska og eins og nafnið gefur til kynna með rauða fætur. Hún verpir hvergi, svo vitað sé með vissu, nema á Pribiloffeyjum og Kommandereyjum í Beringshafi, en grunur leikur þó á, að hún muni einnig verpa eitthvað á hinum ytri Aljútaeyjum.
