Octopussy
Octopussy er bresk njósnamynd frá 1983 og þrettánda myndin sem Eon Productions gerðu um leyniþjónustumanninn James Bond. Þetta var sjötta myndin þar sem Roger Moore lék aðalhlutverkið og önnur myndin sem John Glen leikstýrði. Handritið var eftir George MacDonald Fraser, Richard Maibaum og Michael G. Wilson. Titillinn er fenginn úr smásögu eftir Ian Fleming. Sagan er að mestu frumsamin, en inniheldur eitt atriði úr annarri smásögu, „The property of a lady“.[1]
Í myndinni fæst Bond við sovéska stríðshaukinn Orlov hershöfðingja (Steven Berkoff), sem er andsnúinn afvopnunarviðræðum risaveldanna á tímum kalda stríðsins. Til að fjármagna aðgerðir sínar hefur Orlov stolið skartgripum úr safni Rómanovættar og skipt þeim út fyrir eftirlíkingar. Smyglarinn Karim Khan (Louis Jordan) og athafnakonan Octopussy (Maud Adams), aðstoða Orlov við að koma skartgripunum í verð á Vesturlöndum, og nýta til þess fjölleikahús sem Octopussy rekur. Bond rekur slóðina til Udaipur á Indlandi þar sem hann fréttir af fundi Khan og Orlovs í Karl Marx-Stadt. Orlov hyggst nota sirkusinn til að koma kjarnorkjusprengju inn á bandaríska herstöð í Vestur-Þýskalandi, en Bond tekst að aftengja sprengjuna á síðustu stundu. Menn Gogols hershöfðingja (Walter Gotell) drepa Orlov. Lokaatriði myndarinnar er uppgjör milli Octopussy og Khan, þar sem Khan og handbendi hans, Gobinda (Kabir Bedi), ná að flýja í flugvél með Octopussy sem gísl. Bond berst við Gobinda á þaki flugvélarinnar og bjargar Octopussy rétt áður en vélin rekst á klettavegg með Khan innanborðs.
Myndin var tekin á nokkrum stöðum í Berlín (Checkpoint Charlie, Potsdamer Platz, Spandau-fangelsið) og í Rajastan á Indlandi (Udaipur, Monsúnhöllin, Vatnahöllin og Jag Mandir-höll).[2] Mörg atriði voru tekin í Bretlandi og lokaatriðið var að hluta tekið í Utah í Bandaríkjunum.[3] John Barry sá um tónlistina og samdi upphafslagið, „All time high“, sem var flutt af Rita Coolidge.[4]
Octopussy var fyrsta Bondmyndin sem Metro-Goldwyn-Mayer dreifðu eftir kaupin á United Artists árið 1981. Tekjur myndarinnar voru eilítið minni en fyrri myndar, en náðu þó 187,5 milljón dölum á heimsvísu.[5] Myndin gekk talsvert betur en Bondmynd Warner Bros, Segðu aldrei aftur aldrei, sem kom út sama ár.[6] Myndin hefur fengið misjafna dóma; hrós fyrir tökustaði og spennuatriði, en gagnrýni fyrir ruglingslegt handrit, gamaldags karlrembuhúmor, og leik Moore og Adams.[7][8] Myndin var jólamynd Tónabíós 1983 og fyrsta Bondmyndin sem var sýnd á Íslandi sama ár og hún var frumsýnd alþjóðlega. Segðu aldrei aftur aldrei var jólamynd Bíóhallarinnar á sama tíma.[9]
Tilvísanir
[breyta | breyta frumkóða]- ↑ Barnes, Alan; Hearn, Marcus (2001). Kiss Kiss Bang! Bang!: the Unofficial James Bond Film Companion. Batsford Books. bls. 149. ISBN 978-0-7134-8182-2.
- ↑ „Octopussy“. American Film Institute. Afrit af uppruna á 23 maí 2022. Sótt 11 júní 2021.
- ↑ D'Arc, James V. (2010). When Hollywood came to town: a history of moviemaking in Utah. Layton, Utah: Gibbs Smith. ISBN 9781423605874.
- ↑ Fiegel, Eddi (2012). John Barry: A Sixties Theme: From James Bond to Midnight Cowboy. Faber & Faber. bls. 207. ISBN 978-0571299119.
- ↑ „Octopussy“. The Numbers. Nash Information Services, LLC. Afrit af uppruna á 7. mars 2014. Sótt 8 ágúst 2011.
- ↑ „James Bond Movies at the Box Office“. Box Office Mojo. Afrit af uppruna á 25 apríl 2013. Sótt 8 ágúst 2011.
- ↑ Canby, Vincent (10 júní 1983). „Film: James Bond Meets 'Octopussy'“. The New York Times. bls. C17. Afrit af uppruna á 24 maí 2015. Sótt 21 ágúst 2007.
- ↑ „23 BEST (AND WORST) JAMES BOND MOVIES“. E!. Afrit af uppruna á 13 nóvember 2012. Sótt 13 ágúst 2007.
- ↑ „Bíó“. DV. 10. desember 1983. bls. 46.
