No Borders Iceland

No Borders Iceland er hluti af alþjóðlegu neti sjálfstæðra samtaka sem berjast gegn brottvísun flóttamanna.

Uppruni samtakanna

No Borders samtökin á Íslandi voru stofnuð stuttu eftir að hópur aðgerðasinna hljóp út á flugbrautina í Keflavík til að stöðva brottvísun flóttamannsins Paul Ramses árið 2008. Eftir að hafa fengið alþjóðlega vernd á Íslandi sagði Paul aðgerðasinnanna hafa bjargað lífi sínu.

Með þessu varð Paul eini umsækjandinn á tuttugu ára tímabili, frá 1988 til 2008, sem fékk stöðu flóttamanns á Íslandi.

Starfsemi

Samtökin halda úti starfsemi af ýmsum toga, svo sem mótmælaherferðum, samstöðufundum, beinum aðgerðum, samfélagskvöldverðum, tónleikahaldi, fyrirlestrum, fræðsluefni, veitingu umsagna vegna lagabreytinga sem snúa að útlendingum, greinaskrifum og annars konar framtaki.

Mótmæli gegn brottvísunum

No Borders Iceland hefur frá stofnun staðið að mótmælum gegn brottvísun flóttamanna, fjöldi mótmælafunda síðustu ára hleypur á marga tugi, þar koma fyrir mál sem snúa að einstaklingum, fylgdarlausum börnum, fjölskyldum og fleiri hópum. Þar má nefna mál Yazans Tamimi, Oscar Anders Bocanegra Florez og Eze Henry Okafor.

Samvinna með flóttamönnum

Ein helsta hugsjón samtakanna gengur út á valdeflingu flóttamanna og þátttöku í réttindabaráttu þeirra. Auk þeirra aðgerða sem samtökin standa sjálf fyrir hafa þau gjarnan stutt við aðgerðir sem til voru komnar af frumkvæði flóttamannanna sjálfra. Þar má nefna Samstöðutjaldið á Austurvelli þar sem þrýst var á stjórnvöld að standa við gefin loforð um fjölskyldusameining Palestínamanna. Sú mótmælaherferð stóð yfir frá desember 2023 til apríl 2024.

Tónleikahald

Samtökin standa að tónleikaröðinni Tónleikar gegn landamærum og árlegu tónlistarhátíðinni Hátíð gegn landamærum. Páll Óskar og heimsfræga rússneska pönkhljómsveitin Pussy Riot eru meðal þeirra sem hafa troðið upp í tónleikaröðinni.