Morðið á Charlie Kirk

Morðið á Charlie Kirk

Tjaldið sem Kirk sat í þegar hann var skotinn.
Staðsetning	Utah Valley háskólinn, Orem, Utah, BNA
Dagsetning	10. september 2025 12:23 MDT (UTC-06:00)
Skotmark	Charlie Kirk
Tegund af árás	Skotárás
Vopn	.30-06 Mauser M98 boltalás riffill
Látnir	1 (Kirk)
Sakaður	Tyler James Robinson

Þann 10. september 2025 kl. 12:23 (UTC -6) var bandaríski hægri sinnaði áhrifavaldurinn Charlie Kirk skotinn til bana á meðan hann ávarpaði áhorfendur á útisvæði Utah Valley-háskólans í Orem, Utah í Bandaríkjunum. Útisamkoman var fyrsta í röð samkomna sem hann hafði ætlað sér að halda sem hluti af svokölluðu American Comeback Tour yfir haustið. Samkomurnar voru skipulagðar af samtökunum Turning Point USA sem Kirk var meðstofnandi af.

Þann 12. september var tilkynnt að Tyler Robinson, 22 ára maður frá Utah, hafði verið handtekinn fyrir morðið. Tveir einstaklingar voru í fyrstu handteknir en sleppt eftir yfirheyrslur og töldu yfirvöld að þeir hefðu engin tengsl við málið.

Morðið vakti mikil viðbrögð í Bandaríkjunum. Í kjölfar morðsins fyrirskipaði forseti Bandaríkjanna, Donald Trump, að öllum fánum landsins bæri að vera dregnir í hálfa stöng í fjóra daga.

Morðið

Kirk sat undir tjaldi á botni grassvæðisins vinstra megin, skotinu var hleypt af þaki byggingarinnar efst til hægri.

Kort af svæðinu: (1) grunaði klukkan 11:50, (2) undirgöng, (3) bílastæðahús, (4) skotmaðurinn á þakinu, (5) Charlie Kirk, (6) grunaði stekkur af þakinu, (7) riffill finnst á skógi vöxnu svæði.

Grunaði skotmaðurinn kom á háskólasvæðið á gráum Dodge Challenger klukkan 8:29 MDT (UTC-6). Upptökur úr öryggismyndavélum sýna að hann var öðruvísi klæddur en þegar skotárásin átti sér stað.

Rannsakendur sögðu að hinn grunaði hefði sést aftur á öryggismyndavélum klukkan 11:50 þar sem hann var að koma úr graslendi inn á bílastæði á háskólasvæðinu. Myndband sem bandaríski slúðurfréttamiðillinn TMZ birti á samfélagsmiðlinum X virðist sýna hinn grunaða á því svæði sem rannsakendur höfðu lýst. Klukkan 11:53 sést hinn grunaði nema staðar efst í stiga þar sem hann tekur út símann sinn áður en hann heldur áfram í undirgöng. Ljósmyndir sem alríkislögreglan birti sýna hinn grunaða labba upp stiga í bílastæðahúsi við hliðina á göngunum. Viðburðurinn hans Charlie Kirk byrjaði klukkan rúmlega 12:00. Rannsakendur sögðu að hann sást klukkan 12:02 labbandi við norðurhlið Losee Center-byggingarinnar. Samkvæmt skriflegri yfirlýsingu er hinn grunaði sagður hafa farið inn í Losee Center á suðausturhliðinni, hann sést síðan fara upp stiga við hliðina á byggingunni 13 mínútum síðar. Rannsakendur sögðu að klukkan 12:22 hafi hinn grunaði verið kominn upp á þak Losee Center þar sem hann lá á maganum og snéri að Kirk.

Klukkan 12:23 að staðartíma var Kirk skotinn á meðan hann ávarpaði áhorfendur á American Comeback Tour útisamkomu. Einu skoti var hleypt af og hæfði Kirk í hálsinn. Hann sat undir tjaldi og var nýbúinn að svara spurningu um tölur yfir fjöldaskotárásir í Bandaríkjunum sem væru framdar af trans fólki. Samkvæmt háskólanum var skotinu hleypt af þaki Losee Center, nærliggjandi byggingu á háskólasvæðinu, rúmlega 180 metrum í burtu. Það var síðan endurskoðað og staðfest að skotinu var hleypt af 130 metra færi.

Myndbönd voru birt á netinu sem sýna skotmann hlaupandi frá suðurhorni þaksins á Losee Center, þaðan sem hann skaut Kirk, til norðurhornsins þar sem jörðin var hærri og hann gat hangið af þakbrúninni og fallið til jarðar, sem gerðist klukkan 12:24. Lófaför og DNA-ummerki fundust á þakinu ásamt skófari sem sýndu að hinn grunaði hefði verið í Converse-skóm. Hinn grunaði fór síðan inn í skógi vaxið svæði norðan við háskólasvæðið þar sem seinna fannst riffill með sjónauka og patrónur sem hafði verið skrifað á.

Kirk var í kjölfarið fluttur á spítala. Klukkan 13:45 að staðartíma var Kirk talinn vera í lífshættu. Donald Trump staðfesti andlát Charlie Kirk á Truth Social-notandasíðu sinni klukkan 14:40 að staðartíma sem var síðan staðfest af talsmanni Kirk.

Rannsókn

Tveir menn voru í fyrstu handteknir grunaðir um morðið en sleppt eftir yfirheyrslu og ekki taldir tengjast málinu.

Víðtæk leit að skotmanninum hófst. Daginn eftir morðið sagði bandaríska alríkislögreglan (FBI) að þeir hefðu fundið Mauser .30-06 riffil með boltalás vafinn í handklæði í skógi nálægt Utah Valley-háskólanum sem er talinn hafa verið notaður við morðið. Einnig hafði alríkislögreglan til skoðunar myndir og myndskeið sem sýndu grunaða skotmanninn. Að sögn Robert Coles, yfirmanni alríkislögreglunnar í Salt Lake, hefði alríkislögreglan undir höndum skó-, lófa- og framhandleggsför til rannsóknar.

Þann 12. september var tilkynnt að Tyler Robinson, 22 ára maður frá Utah, hafði verið handtekinn fyrir morðið.

Hinn grunaði

Tyler James Robinson (f. 16. apríl 2003) var handtekinn á heimili sínu þann 12. september eftir að pabbi hans þekkti hann á myndum og hafði samband við yfirvöld. Leitað hafði verið að skotmanninum í 33 klukkustundir þegar hann var handtekinn.

Þegar hann var handtekinn var Robinson 22 ára og bjó í St. George í Utah, rúmlega þriggja og hálfs tíma akstri frá Utah Valley-háskólanum. Hann var á þriðja ári að læra rafvirkjun í Dixie Technical College. Hann hafði áður verið í Utah Valley-háskólanum en hætt eftir eina önn.