Milli fjalls og fjöru

Milli fjalls og fjöru
Leikskrá
Leikstjóri	Loftur Guðmundsson
Handritshöfundur	Loftur Guðmundsson
Framleiðandi	Loftur Guðmundsson
Leikarar	Brynjólfur Jóhannesson Alfreð Andrésson Inga Þórðardóttir Gunnar Eyjólfsson Ingibjörg Steinsdóttir Jón Leós Bryndís Pétursdóttir
Dreifiaðili	Gamla bíó
Frumsýning	14. janúar, 1949
Lengd	91 mín.
Tungumál	íslenska

Milli fjalls og fjöru er fyrsta íslenska kvikmyndin í fullri lengd, sem og fyrsta talmyndin. Hún var frumsýnd árið 1949 og er 91 mínúta að lengd. Leikstjóri myndarinnar var Loftur Guðmundsson sem var mikill frumkvöðull í kvikmyndagerð á Íslandi. Myndin var frumsýnd í Gamla bíói 13. janúar 1949 og almennar sýningar hófust daginn eftir.

Myndin var páskamynd Gamla bíós árið 1969.

Framleiðsa

Loftur Guðmundsson sá sjálfur um flest sem að myndinni laut. Hann fjármagnaði myndina sjálfur og sá um framleiðsluna, en Hákon sonur hans var aðstoðarmaður. Upptökur stóðu yfir sumarið 1948 í Hvalfirði og á höfuðborgarsvæðinu. Innitökur voru í leikfimisal Sankti Jósefssystra í Hafnarfirði. Þar var reist krambúð, baðstofa og nokkur önnur herbergi. Leikarar voru margir þjóðþekktir og komu flestir úr Leikfélagi Reykjavíkur.

Söguþráður

Ingvar (Gunnar Eyjólfsson) er sveitapiltur og býr hjá foreldrum sínum. Foreldrar hans skulda sýslumanni mikla peninga. Ingvar reynir að borga skuldirnar með því að vinna sem fjárhirðir fyrir sýslumann (Brynjólf Jóhannesson). Einn daginn er Ingvar með vinkonu sinni, Sigrúnu (Bryndísi Pétursdóttur), úti í fjöru. Þar finnur Ingvar afskorinn sauðahaus. Hann grunar að þar hafi sauðaþjófar verið á ferð og tekur hausinn með sér heim. Seinna um daginn fer Gvendur, aðstoðarmaður sýslumanns, heim til Ingvars að rukka skuldina. Faðir hans getur ekki borgað þá, en lofar að gera upp um haustið. Á leiðinni heim kemur Gvendur auga á sauðahausinn og tekur hann með sér sem sönnunargagn um að Ingvar sé sauðaþjófur.

Í millitíðinni fær Ingvar vinnu hjá Hansen kaupmanni (Alfreð Andréssyni), fósturföður Sigrúnar, og hættir sem fjárhirðir. Hann nær ekki fyrsta vinnudeginum því hann er handtekinn af sýslumanni fyrir sauðaþjófnað. Fljótlega nær Ingvar að strjúka úr fangelsi og fer í felur. Menn sýslumans hefja leit að Ingvari. Í leitinni sjá þeir þrjá menn á bát stela kindum sýslumanns. Þannig er sakleysi Ingvars sannað. Hann fer strax að vinna fyrir Hansen. Nokkrum dögum síðar kemur Sigrún heim frá útlöndum og Ingvar játar ást sína fyrir henni.