Michael Caine
Sir Michael Caine | |
|---|---|
.jpg) Michael Caine árið 2012. | |
| Upplýsingar | |
| Fæddur | Maurice Joseph Micklewhite 14. mars 1933 Rotherhithe, London, Englandi |
| Þjóðerni | Enskur |
| Ár virkur | 1950–2023 |
| Maki | Patricia Haines (g. 1954; sk. 1958) Shakira Baksh (g. 1973) |
| Börn | 2 |
| Vefsíða | michaelcaine |
| Undirskrift |  |
| Óskarsverðlaun | |
| Besti leikari í aukahlutverki fyrir Hannah and Her Sisters (1986) Besti leikari í aukahlutverki fyrir The Cider House Rules (1999) | |
| BAFTA-verðlaun | |
| Besti aðalleikari fyrir Educating Rita (1983) | |
Sir Michael Caine (fæddur Maurice Joseph Micklewhite; 14. mars 1933) er enskur leikari. Caine er þekktur fyrir áberandi Cockney-hreim sinn og hefur birst í rúmlega 130 kvikmyndum á ferli sem nær yfir átta áratugi.
Æviágrip
[breyta | breyta frumkóða]Michael Caine fæddist undir nafninu Maurice Micklewhite og ólst upp í fátækrahverfi í Lundúnum. Faðir hans var vaktmaður á fiskmarkaði og móðir hans var ræstingakona. Æskuheimili hans varð fyrir sprengju í seinni heimsstyrjöldinni og hann var því sendur á fósturheimili. Hann fór aftur til móður sinnar, sem þá var orðin matráðskona á herragarði, eftir stríðið.[1]
Maurica Micklewhite hætti skólagöngu þegar hann var fimmtán ára gamall og vann ýmis láglaunastörf þar til hann var ráðinn til starfa í leikhúsi.[1] Micklewhite, sem hafði haft áhuga á kvikmyndum og leiklist frá barnæsku, tók upp sviðsnafnið Michael Caine eftir að hafa horft á myndina The Caine Mutiny.[2]
Caine gegndi herþjónustu í Berlín og Kóreu árin 1951–53 en sneri sér síðan alfarið að leiklist. Hann vann hjá atvinnuleikhúsum í Horshan og Lowestoft frá 1953 til 1955 og síðan hjá Theatre Workshop í Lundúnum. Á tímabilinu 1957 til 1963 lék Caine í rúmlega 100 sjónvarpsleikritum og einu leiksviðsverki í Lundúnum.[3] Fyrsta kvikmyndahlutverk Caine var hlutverk liðsforingja í myndinni Zulu. Það hlutverk var ekki stórt en það leiddi til þess að honum var boðið aðalhlutverkið í kvikmyndinni Ipcress File árið 1965, þar sem hann lék njósnarann Harry Palmer.[2] Á næstu árum eftir hana birtist hann að meðaltali í tveimur til fimm kvikmyndum á ári.[3]
Caine hlaut tvenn Óskarsverðlaun á ferli sínum, í bæði skiptin fyrir leik í aukahlutverki. Verðlaunin hlaut hann fyrir kvikmyndirnar Hannah and Her Sisters og The Cider House Rules.[4]
Í september 2023 tilkynnti Caine að hann væri sestur í helgan stein.[4]
Einkahagir
[breyta | breyta frumkóða]Caine er tvíkvæntur. Hann kvæntist leikkonunni Patriciu Haines árið 1954, þegar hann var 24 ára, en skildi við hana eftir tveggja ára hjónaband. Dóttir hans úr þessu hjónabandi var sett í fóstur hjá tengdaforeldrum hans. Seinni eiginkona hans er Shakira Baksh, sem hann kvæntist árið 1974 og eignaðist með henni eina dóttur.[3]
Eftir að móðir Caine lést árið 1989 komst hann að því að hún hafði átt son utan hjónabands áður en hún giftist föður hans. Caine og albróðir hans höfðu aldrei vitað að þeir áttu þennan hálfbróður allan þann tíma sem móðir þeirra var á lífi.[5]
Tilvísanir
[breyta | breyta frumkóða]- 1 2 „Uppalinn í mikilli fátækt og vesæld“. DV. 4. júlí 1992. bls. 42.
- 1 2 „Michael Caine“. Vikan. 28. ágúst 1986. bls. 23.
- 1 2 3 „Úr fátækt í frama“. Morgunblaðið. 4. júlí 1992. bls. 20–21.
- 1 2 Bjarki Sigurðsson (22. september 2023). „Michael Caine „eiginlega" sestur í helgan stein“. Vísir. Sótt 7. janúar 2026.
- ↑ „Stórleikarinn Michael Caine komst að skuggalegu fjölskylduleyndarmáli eftir andlát móður sinnar“. DV. 4. september 2025. Sótt 7. janúar 2026.
