Með heiminn að fótum sér
.jpg)
Með heiminn að fótum sér (enska: The World Is Not Enough) er bresk njósnamynd frá 1999 og nítjánda myndin sem Eon Productions gerðu um leyniþjónustumanninn James Bond. Þetta var þriðja myndin þar sem Pierce Brosnan fór með aðalhlutverkið. Leikstjóri var Michael Apted og framleiðendur voru Michael G. Wilson og Barbara Broccoli. Enskur titill myndarinnar er þýðing á kjörorði Bond-ættarinnar, orbis non sufficit, sem kom fram í myndinni Í leyniþjónustu hennar hátignar.
Myndin hefst á því að Bond endurheimtir fé fyrir breska auðkýfinginn Robert King (David Calder), sem er persónulegur vinur M (Judi Dench). Peningarnir reynast þaktir sprengiefni og þegar King sækir féð í höfuðstöðvar MI6 deyr hann í sprengingu. Dóttir King, Elektra (Sophie Marceau) tekur við olíuveldi hans og byggir olíuleiðslu í Aserbaísjan. Bond flýgur þangað, og kemst að því að öryggisvörður hennar, Davidov (Ulrich Thomsen), er í slagtogi með hryðjuverkamanninum Renard (Robert Carlyle). Bond rekst líka á rússneska mafíuforingjann Vasilíj Zúkovskíj (Robbie Coltrane) sem rekur spilavíti og hefur hagnast á kavíar. Bond rekur slóð Renards til eldflaugastöðvar í Kasakstan þar sem hann hittir bandaríska kjarneðlisfræðinginn Christmas Jones (Denise Richards). Renard og menn hans ræna plútóníumkjarna úr kjarnaoddi, en Bond og Jones sleppa naumlega þegar stöðin springur. Bond grunar að Elektra sé í slagtogi við Renard og varar M við, en Elektra rænir þá M. Bond finnur Zúkovskíj í kavíarverksmiðju þess síðarnefnda við Kaspíahaf og kemst að því að Elektra og Renard hafa keypt sovéskan kjarnorkukafbát sem á að afhenda í Istanbúl. Þyrlur Elektru ráðast á Bond, Jones og Zúkovskíj með hjólsögum sem leggja kavíarverksmiðjuna í rúst. Bond og Jones átta sig á því að Elektra og Renard hyggjast nota plútóníumið til að breyta kafbátnum í fljótandi kjarnorkusprengju. Þau finna þau í Meyjarturninum í Istanbúlhöfn þar sem M er í haldi. Bond sleppur úr klóm Elektru með hjálp Zúkovskíjs, frelsar M og skýtur Elektru til bana. Hann fer svo um borð í kafbátinn ásamt Jones þar sem þau yfirbuga Renard og koma í veg fyrir að hann nái að setja plútóníumið í kjarnaofninn.
Hugmyndin að söguþræðinum kom úr frétt sem Barbara Broccoli sá um átök um olíulindir við Kaspíahaf í kjölfar upplausnar Sovétríkjanna.[1] Þau Michael G. Wilson fengu handritshöfundana Neal Purvis og Robert Wade til að skrifa handritið ásamt Bruce Feirstein, en þeir höfðu þá nýlokið við myndina Plunkett & Macleane með Robert Carlyle í einu aðalhlutverkinu.[2] Tökur fóru fram á Spáni, í Frakklandi, Aserbaísjan og Tyrklandi, auk Bretlands (Pinewood Studios). Þetta var önnur Bondmyndin þar sem David Arnold sá um tónlistina. Titillagið var samið af Arnold og Don Black, og flutt af bandarísku hljómsveitinni Garbage.[3] Myndin fékk misjafna dóma,[4] en gekk mjög vel í kvikmyndahúsum með 361 milljón dala tekjur á heimsvísu.[5] Hún varð 8. tekjuhæsta mynd ársins. Þetta var fyrsta Bondmyndin sem var dreift undir merkjum Metro-Goldwyn-Mayer í stað United Artists. Myndin var frumsýnd í Bandaríkjunum 19. nóvember 1999 og sama dag í Bíóborginni á Íslandi.[6] Hún var ekki kynnt undir íslenska titlinum, Með heiminn að fótum sér, fyrr en tveimur árum síðar, þegar hún var sýnd í sjónvarpi.[7]
Tilvísanir
[breyta | breyta frumkóða]- ↑ Cork, John; Stutz, Collin (2007). James Bond Encyclopedia. London: Dorling Kindersley. bls. 306–7. ISBN 978-1-4053-3427-3.
- ↑ Priggé, Steven. Movie moguls speak: interviews with top film producers Geymt 21 júní 2013 í Wayback Machine (p.27)
- ↑ Rogers, Jude (31 október 2008). „For your ears only“. The Guardian. London. Afrit af uppruna á 7 janúar 2014. Sótt 24 maí 2010.
- ↑ „The World Is Not Enough“. Metacritic. Afrit af uppruna á 4. desember 2023. Sótt 13 október 2023.
- ↑ „The World is Not Enough (1999)“. The Numbers. Sótt 19 janúar 2025.
- ↑ „Hringiðan“. DV. 22. nóvember 1999. bls. 40.
- ↑ „Tilvera“. DV. 9.6.2001. bls. 62.
