Lenín Moreno

Úr Wikipediu, frjálsa alfræðiritinu
Jump to navigation Jump to search
Lenín Moreno
Lenin Moreno, president of Ecuador.jpg
Forseti Ekvadors
Núverandi
Tók við embætti
24. maí 2017
Persónulegar upplýsingar
Fæddur19. mars 1953 (1953-03-19) (66 ára)
Nuevo Rocafuerte, Ekvador
ÞjóðerniEkvadorskur
StjórnmálaflokkurPAIS-bandalagið
MakiRocío González (g. 1974)
Börn3
HáskóliMiðháskólinn í Ekvador
StarfStjórnmálamaður
Undirskrift

Lenín Boltaire Moreno Garcés (f. 19. mars 1953) er núverandi forseti Ekvadors. Hann hefur verið forseti landsins frá árinu 2017, en þar áður var hann varaforseti landsins frá 2007 til 2013 í forsetatíð forvera síns, Rafaels Correa.

Moreno varð fyrir byssuskoti árið 1998 í innbrotstilraun og hefur upp frá því notast við hjólastól. Hann er eini þjóðarleiðtogi í heimi sem notar hjólastól og á varaforsetatíð sinni varð hann kunnur fyrir að vinna að bættum aðstæðum fyrir bæklaða Ekvadora. Meðal annars stuðlaði hann að því að kvótar voru settir á ekvadorsk fyrirtæki til að auðvelda fötluðum að hljóta vinnuráðningu og að því að framlög ekvadorska ríkisins til aðstoðar fatlaðra voru hækkuð fimmtíufalt. Vegna starfa Morenos í þágu fatlaðra tilnefndu Ekvadorar búsettir í Noregi hann til friðarverðlauna Nóbels árið 2012 en hann varð að endingu ekki fyrir valinu.

Moreno lét af embætti varaforseta árið 2013 en bauð sig fram til forseta Ekvadors árið 2017 og vann nauman sigur með 51.16% atkvæða í annarri umferð kosninganna.[1][2][3] Moreno bauð sig fram fyrir hið vinstrisinnaða PAIS-bandalag, sem hefur stjórnað Ekvador frá því að Correa varð forseti árið 2007. Correa lagði í fyrstu blessun sína við að Moreno tæki við af honum en eftir að Moreno tók við embætti hefur samband hans við forvera sinn versnað verulega. Moreno hefur numið úr gildi margar af róttækustu vinstriumbótunum sem framkvæmdar voru á forsetatíð Correa og fjarlægst þannig nokkuð yfirlýsta stefnuskrá sína úr kosningabaráttunni.[4] Moreno hefur einnig reynt að bæta samband Ekvadors við Bandaríkin, en samband þjóðanna var mjög stirt á valdatíð Correa. Í þessu skyni hefur Moreno meðal annars dregið Ekvador úr Bólivaríska bandalaginu fyrir Ameríkuþjóðir, bandalagi vinstrisinnaðra stjórna í Rómönsku Ameríku sem Hugo Chávez forseti Venesúela stofnaði árið 2004.[5]

Moreno fjarlægðist stefnu Correa enn frekar með viðhorfi sínu til Julians Assange, sem hafði hlotið hæli í sendiráði Ekvadors í London árið 2012 með leyfi Correa. Árið 2018 setti Moreno strangari skilyrði fyrir því að Assange hefði áfram hæli í sendiráðinu, meðal annars með því að neita honum um internetaðgang. Í mars árið 2019 ákvað Moreno loks að svipta Assange hæli í sendiráðinu og úthýsa honum fyrir ítrekuð brot. Correa brást illa við ákvörðun Morenos og kallaði hann „mesta landráðamann í sögu Ekvadors og Suður-Ameríku“.[6]

Tilvísanir[breyta | breyta frumkóða]

  1. „El Futuro Es Ahora“.
  2. „CNE informa "resultados irreversibles": Moreno 51.16% – Lasso 48.84%“ (spænska). Ecuavisa (4. apríl 2017), skoðað þann 12. apríl 2019.
  3. „Moreno nýkjörinn forseti Ekvador“. mbl.is (3. apríl 2017), skoðað þann 12. apríl 2019.
  4. „¿Cuáles son las siete preguntas del referéndum y la consulta popular del 4 de febrero del 2018 en Ecuador?“ (spænska). El Comercio, skoðað þann 12. apríl 2019.
  5. Ecuador leaves Venezuelan-run regional alliance. 23. ágúst 2018. The Seattle Times. Skoðað 12. apríl 2019.
  6. Þórgnýr Einar Albertsson (12. apríl 2019). „Svipting hælis Assange hættulegt fordæmi“. Fréttablaðið, skoðað þann 12. apríl 2019.


Fyrirrennari:
Rafael Correa
Forseti Ekvadors
(24. maí 2017 – )
Eftirmaður:
Enn í embætti