La Baie des cochons

La Baie des cochons (Íslenska Svínaflói) er fyrsta bókin í ritröðinni Sígilt ævintýri um Sval og Val (franska Les Adventures de Spirou et Fantasio Classique) sem hóf göngu sína árið 2024. Yfirlýst markmið bókaflokksins er að fanga anda Svals og Vals-bókanna frá því að André Franquin hélt um penna, bæði varðandi teiknistíl og sögusvið. Höfundar og teiknararar sögunnar eru Elric, Clément Lemoine og Michaël Baril. Bókin hefur enn ekki komið út á íslensku.

Söguþráður

Svalur og Valur eru komnir til New York þar sem Valur hefur fengið það verkefni að fjalla um ræðu Fidel Castro á Allsherjarþingi Sameinuðu þjóðanna. Á flugvellinum höfðu þeir mælt sér mót við vísindamanninn Longplaying úr ævintýrinu um Fangann í styttunni í því skyni að skila honum Göggu, en það er lítið undratæki sem kom mjög við sögu í Fanganum í styttunni og getur m.a. yfirunnið þyngdaraflið og stuðlað að hröðum vexti plantna.

Það verða fagnaðarfundir þegar þeir hittast, þótt félagarnir undrist það nokkuð hvað Longplaying, sem hafði verið pólitískur hrekkleysingi, virðist nú vera orðinn grjótharður bandarískur ættjarðarvinur og and-kommúnisti. Þeir dveljast allir á sama hóteli og Kastró og reynist Longplaying vera viðriðinn samsæri CIA-manna sem miðar að því að eitra fyrir byltingarforingjanum þannig að hann missi sitt fræga og tilkomumikla alskegg. Lífverðir Kastró komast á snoðir um áformin. Þeir telja ranglega að Svalur hafi verið hluti af samsærinu. Þeir ræna honum og nema á brott til Havana þar sem honum er varpað í fangelsi. Svalur ákveður að hvatningu CIA-fulltrúanna að halda þegar til Kúbu ásamt Gormdýrinu og íkornanum Pésa að bjarga vini sínum. Longplaying lætur hann fá Göggu til fararinnar.

Í Havana er blaðakonan Bitla stödd að fjalla um afleiðingar kúbversku byltingarinnar. Þótt hún sé í grunninn jákvæð í garð byltingarinnar lendir hún í ýmsum útstöðum við öryggislögregluna og sjálfan Che Guevara sem er afar hortugur og undirförull. Bitla og Che mæta í afmælisveislu sem haldin er fyrir barnungan og frekan son Kastrós. Valur er einnig mættur á svæðið, dulbúinn sem trúður, til að hitta Juanitu Kastró systur leiðtogans og samverkakonu CIA. Hún segir honum hvar búðir skæruliða and-kommúnista sé að finna. Ekki vill þó betur til en svo að trúðurinn/Valur er dreginn upp á svið til að skemmta. Sýningin endar með ósköpum eftir að Gormurinn lætur öllum illum látum. Þegar Che gefur öryggisvörðum fyrirmæli um að skjóta skepnuna grípur Valur til Göggu til að bjarga þeim og flýr í kjölfarið ásamt Bitlu undan hópi hermanna.

Æsilegur eltingaleikur, fyrst um götur Havana og síðar í frumskóginum, uns Valur og Bitla hitta fyrir skæruliðana. Þegar þangað er komið upplýsir Valur að CIA hyggist á allra næstu dögum bylta Kastró-stjórninni með innrás í Svínaflóa. Honum til mikilla vonbrigða kemur í ljós að skæruliðarnir eru ekki sérlega burðugur hópur, á meðan Bitla leggur á flótta - staðráðin í að upplýsa stjórnvöld um hina yfirvofandi árás. Henni er hins vegar varpað í fangaklefa þar sem hún hittir fyrir Sval.

Valur og skæruliðarnir brjótast inn í fangelsið, enda hefur Valur lofað að láta þá fá undratækið Göggu ef þeim tækist að frelsa Sval. Þeir svíkja samkomulagið og við tekur mikill hasar þar sem Gagga skiptir í sífellu um hendur og menn Kastrós, skæruliðar og Svalur og Valur skiptast á að hafa tækið undir höndum. Stjórnarherinn vill beita tækinu til að tortíma innrásarhernum sem stefnir að lendingu í Svínaflóa. Svalur, Valur og Bitla ná að afstýra því, en tækið veldur þó óðavexti kóralla í hafinu sem gerir það að verkum að Bandaríkjamenn verða frá að hverfa. Kennedy Bandaríkjaforseti verður bálvondur en blaðafrétt Bitlu af atburðunum vekur mikla athygli.

Fróðleiksmolar

Kápumynd bókarinnar er augljós vísun í forsíður Svals og górilluapanna og Fangans í styttunni
Flestar Svals & Vals-sögur eiga sér stað í tilbúnum löndum og samfélögum, einkum í tíð Franquin. Það að staðsetja sögu svo ákveðið í tíma og rúmi, með heimskunnum aukapersónum er því óvenjulegt frávik í sögu ritraðarinnar.
Svalur kemur ekki við sögu í 34 blaðsíður um miðbik bókarinnar, meðan hann er fangi Kúbustjórnar.
Gormdýrið er í stóru hlutverki nær allan tímann, sem er óvenjulegt í hliðarævintýrum um Sval og Val.

Heimildir

Splint I Cuba. Cobolt. 2025. ISBN 978-87-7588-108-6.