Lögbirtingablað
Lögbirtingablað er annað tveggja rita sem gefin eru út samkvæmt lögum um Stjórnartíðindi og Lögbirtingablað. Í Lögbirtingablaðinu eru birtar ýmsar opinberar auglýsingar, þar á meðal um dómstefnur, opinber skipti, kaupmála, nauðungarsölur, lögræðissviptingar, og stofnun félaga/fyrirtækja. Blaðið var fyrst gefið út á prenti árið 1908 og árið 2002 var hafin útgáfa þess á rafrænu formi. Hvort tiltekin auglýsing hafi bindandi áhrif á réttarstöðu aðila fer aðallega eftir lagaheimildinni sem hún byggist á og birtingarhætti hennar innan blaðsins, en staða viðkomandi aðila sem áskrifanda þess er ekki talin skipta máli. Fyrir útkomu blaðsins voru auglýsingar sem þessar birtar í fjölmiðli sem hafði fengið einkarétt til birtingu slíkra auglýsinga hverju sinni.[1] Þótt skilja megi nafn blaðsins þannig að það sé hlutverk þess að birta lög kemur nafnið frá þeirri staðreynd að um sé að ræða lögbirtingu þeirra auglýsinga sem um ræðir.[2]
