Konunglega Grænlandsverslunin

Vöruskemma Konunglegu Grænlandsverslunarinnar í Kaupmannahöfn var reist af Almenna verslunarfélaginu árið 1766 og hét þá det Islandske Pakhus.

Konunglega Grænlandsverslunin (danska: Den Kongelige Grønlandske Handel) var verslunarfélag sem Danakonungur stofnaði eftir gjaldþrot Almenna verslunarfélagsins árið 1774. Almenna verslunarfélagið hafði áður séð um þjónustu við trúboð og landnám Dana á Grænlandi. Konunglega Grænlandsverslunin tók við þessu hlutverki. Félagið fékk einokun á verslun á Grænlandi og fór með stjórn Grænlands allt til ársins 1908. Stjórnin var í höndum hluthafastjórnar í Kaupmannahöfn sem skipaði tvo konunglega eftirlitsmenn, einn fyrir Suður-Grænland með aðsetur í Godthaab og einn fyrir Norður-Grænland með aðsetur í Godhavn. Höfuðstöðvar félagsins í Kaupmannahöfn voru við Grænlandsbryggju í Christianshavn.

Árið 1908 tók innanríkisráðuneyti Danmerkur við stjórn félagsins. Heimastjórn Grænlands tók við stjórn landsins 1979 og tók jafnframt við stjórn félagsins árið 1986. Nafninu var þá breytt í Kalaallit Niuerfiat. Eftir 1992 var félaginu skipt þannig að KNI tók við versluninni, Royal Greenland við útgerðinni og Royal Arctic Line við skipaflutningum. KNI lítur á sig sem arftaka Konunglegu Grænlandsverslunarinnar og fagnaði 250 ára afmæli árið 2024.

Tilvísanir

  Þessi fyrirtækjagrein sem tengist Danmörku er stubbur. Þú getur hjálpað til með því að bæta við greinina.