Kolibri

Kolibri ehf. er íslenskt hugbúnaðarfyrirtæki með aðsetur í Reykjavík. Félagið þróar stafrænar lausnir fyrir fyrirtæki og stofnanir.  

Kolibri var stofnað í maí 2007 sem Sprettur og stofnendur voru Pétur Orri Sæmundsen, Guðlaugur Stefán Egilsson, Petar Shomov og Daði Ingólfsson.

Sagan

2007-2010: Upphafið

Félagið Sprettur var stofnað með það markmið að hjálpa íslenskum fyrirtækjum að innleiða Agile hugmyndir og aðferðir. Eitt af fyrstu verkefnum félagsins var að koma á fót ráðstefnunni Agile Ísland (þá AGILIS) sem haldin var fyrst í ágúst sama ár. Félagið byrjaði strax í júní sama árs að vinna fyrir stærri fyrirtæki í sínum Agile umbreytingum og voru fyrstu viðskiptavinirnir Kaupþing og Síminn.

Á árinu 2008 mótaðist fyrsta útgáfan af tilgangi félagsins: „Að umbreyta íslenskri upplýsingatækni þannig að hún yrði mannlegri, meira skapandi og árangursríkari”. Félagið bauð upp á þjónustuna Agile Stökkpallur sem var 5 vikna prógram til að koma teymum af stað í Scrum eða Kanban. Næstu 5 árin var Agile Stökkpallur notaður í Agile umbreytingu hugbúnaðardeilda margra íslenskra fyrirtækja eins og Landsbankans, CCP, Íslandsbanka, Reiknistofu Bankanna, Marel og Össur.

2010-2011: Marimo og ný starfsemi

Í upphafi árs rann rekstur félagsins Marimo ehf. inn í Sprett og þá urðu stofnendur Marimo Ari Jóhannesson, Guðjón Guðjónsson og Dísa Anderiman hlutahafar í félaginu. Með innkomu nýrra hluthafa breyttist rekstur félagsins umtalsvert og skilgreind voru þrjú tekjusvið: Agile ráðgjöf, fræðsla og hugbúnaðarþróun. Í lok ársins 2011 stofnaði félagið ráðstefnuna Lean Ísland og útvíkkaði þannig starfsemina enn frekar.

2012-2013: Ný strategía

Árið 2012 var mótuð strategían „hugbúnaðarþróun í teymum” sem rammaði inn nýja sérstöðu félagsins, þar sem búið var að tengja saman bæði Agile ráðgjöf og hugbúnaðarþróun í einn þjónustupakka þar sem aldrei fóru færri en þrír starfsmenn inn í hvert verkefni, þ.e. tveir forritarar og einn teymisþjálfari. Fljótlega mótaðist hugmyndin um að allur hugbúnaður sem teymin þróuðu yrði að vera „fallegur og áhugaverður”. Til að byrja með voru utanaðkomandi hönnuðir fengnir inn í teymin en mitt árið 2013 hófst leit að hönnuði til að ráða til félagsins.

2014: Form5 og nýtt nafn

Árið 2014 kaupir Sprettur allt hlutafé í hönnunarstofunni Form5 og stofnendurnir Steinar Ingi Farestveit og Ólafur Nielsen verða hluthafar. Ný ásýnd var hönnuð og á sama tíma fékk félagið nafnið Kolibri.  Með þessum breytingum varð til nýr þjónustupakki sem fékk nafnið Digital Business og þá byrjaði félagið að selja og pakka inn stafrænum umbreytingum.

2015 -núna: Stafrænar umbreytingar

Síðan 2015 hefur félagið unnið að stafrænum umbreytingum.

Viðurkenningar

Kolibri hefur fengið viðurkenningar bæði fyrir byltingarkennda stjórnhætti og fyrir að vera góður vinnustaður .

Ráðstefnur

Agile Ísland ráðstefnan var haldin árlega frá 2007 til 2016.

Fyrsta Lean Ísland ráðstefnan var haldin 2012 .