Árni Sigfússon
Árni Sigfússon (f. 30. júlí 1956 í Vestmannaeyjum) er fyrrverandi borgarstjóri í Reykjavík og bæjarstjóri Reykjanesbæjar. Hann er sonur Sigfúsar J. Árnasonar Johnsen og Kristínar S. Þorsteinsdóttur, kvæntur Bryndísi Guðmundsdóttur, talmeinafræðingi og eiga þau fjögur börn: Aldísi Kristínu, Védísi Hervöru, Guðmund Egil og Sigfús Jóhann. Hann lærði stjórnsýslufræði við Háskólann í Tennessee, BNA. Systkini Árna eru Þorsteinn Ingi Sigfússon, forstjóri Nýsköpunarmiðstöðvar Íslands, Gylfi Sigfússon fyrrverandi forstjóri Eimskips, Margrét Sigfúsdóttir, innanhússarkitekt, Þór Sigfússon, forstjóri Sjóvár og Sif Sigfúsdóttir, fyrrum borgarfulltrúi og markaðsstjóri Viðskiptadeildar HÍ.
Árni sat í stjórn Heimdallar árin 1976 - 1979 og var formaður 1981- 1983. Hann gegndi formennsku í Sambandi ungra sjálfstæðismanna (SUS) á árunum 1987 - 1989 og hefur starfað sem framkvæmdastjóri Stjórnunarfélagsins og framkvæmdastjóri og forstjóri Tæknivals.
Árni var borgarfulltrúi Sjálfstæðisflokksins í Reykjavík í þrettán ár, 1986-1999. Hann gegndi embætti borgarstjóra í Reykjavík í nokkra mánuði árið 1994 er hann tók við af Markúsi Erni Antonssyni 3 mánuðum fyrir kosningar til að freista þess að halda borginni. Það tókst ekki gegn sameinuðum R-lista og varð Ingibjörg Sólrún Gísladóttir borgarstjóri að kosningum loknum.
Árni var bæjarstjóri í Reykjanesbæ 2002-2014, og oddviti Sjálfstæðisflokksins í bæjarstjórn 2002-2018.
| Fyrirrennari: Markús Örn Antonsson |
|
Eftirmaður: Ingibjörg Sólrún Gísladóttir | |||
| Fyrirrennari: Ellert Eiríksson |
|
Eftirmaður: Kjartan Már Kjartansson | |||
