Knattspyrnufélagið Þróttur

Knattspyrnufélagið Þróttur
Fullt nafn	Knattspyrnufélagið Þróttur
Gælunafn/nöfn	Þóttarar Köttarar
Stytt nafn	Þróttur (Skammstöfun: KÞ)
Stofnað	1949
Leikvöllur	Valbjarnarvöllur
Stærð	um 500
Knattspyrnustjóri	Páll Einarsson
Deild	1. deild
2009	11. sæti
Heimabúningur Útibúningur

Knattspyrnufélagið Þróttur var stofnað 5. ágúst 1949 í herbragga við svonefnda Grímstaðavör við Ægissíðu. Stofnendur félagsins voru Halldór Sigurðsson kaupmaður, sem var fyrirmyndin að Tomma í bókum Einars Kárasonar um Djöflaeyjuna, og Eyjólfur Jónsson, síðar lögreglumaður og sundkappi.

Þrátt fyrir að vera í það fyrsta einungis knattspyrnufélag hafa Þróttarar keppt í öðrum greinumí gegnum tíðina, þó mest áhersla hafi verið lögð á knattspyrnuna síðustu ár. Félagið var starfrækt í vesturbæ Reykjavíkur til ársins 1969 þegar því var formlega úthlutað svæði við Sæviðarsund í póstnúmeri 104. Þar starfaði félagið til 1998 þegar því var formlega veitt svæði í Laugardalnum. Þar hefur félagið nú aðsetur. Formaður Þróttar er Jórunn Frímannsdóttir, borgarfulltrúi.

Knattspyrna

Meistaraflokkur karla hjá Þrótti á það vafasama met að hafa fallið úr efstu deild oftast allra liða, en félagið hefur fallið úr efstu deild 10 sinnum. Þróttur keppti fyrst á Íslandsmótinu í knattspyrnu 1953 og tapaði báðum leikjum sínum. Þróttur var meðal þeirra sex liða sem kepptu í 1. deild 1955 (fyrsta deildarkeppnin á Íslandi) og varð fyrsta liðið í íslenskri knattspyrnusögu til að falla úr henni. Í tvígang hefur liðið haldið sér uppi lengur en eitt ár, og í bæði skiptin urðu tímabilin þrjú; fyrst 1978-1980 og svo 1983-1985. Þróttur hefur einu sinni fallið í þriðju deild, 1989. Ásgeir Elíasson hefur þjálfað flest tímabil allra þjálfara meistaraflokks eða tíu (1981-1984 og 2000-2005). Þjálfarar síðustu árin hafa verið Magnús Jónatansson (1989-1991), Ólafur Jóhannesson (1992), Ágúst Hauksson (1993-1996), Willum Þór Þórsson 1997-1999, Ásgeir Elíasson 2000-2005, Atli Eðvaldsson (2005 - 2006). Gunnar Oddsson (2007 - 2009). Þorsteinn Halldórsson (2009). Páll Einarsson (2009 - ...). Á síðustu árum hefur Þróttur teflt fram kvennaliði.

Aðalgrein knattspyrnudeild Þróttar:

Handknattleikur

Strax við stofnun bar á áhuga á handknattleiksdeild innan félagsins, bæði meðal karla og kvenna. Vísir að henni var stofnaður 1951 og voru lið félagsins skráð til keppni strax um það leyti. Árið 1972 varð Óli Kr. Sigurðsson formaður deildarinnar og næstu árin hófst gullöld Þróttar í handboltanum. Meistaraflokkur liðsins komst í efstu deild 1980 og varð bikarmeistari í apríl 1981. Árið eftir komst liðið svo í undanúrslit Evrópubikarkeppninarinnar, en beið að lokum lægri hlut fyrir Dukla frá Prag. En Adam var ekki lengi í paradís því næstu ár lá leiðin niður við með starf meistaraflokks, liðið féll í aðra deild vorið 1986. Á þessum tíma voru helstu burðarásar liðsins farnir, s.s. Sigurður Sveinsson og Páll Ólafsson; sem báðir áttu eftir að gera það gott í atvinnumennskunni næstu ár. Um haustið 1986 var staðan orðið svo slæm að ákveðið var að senda ekki lið í meistaraflokki til leiks. Flokkurinn var síðar endurvakinn, en dofnaði út af aftur og árið 1990 lagðist deildin endanlega út af. Þróttur sendi í fyrsta sinn í mörg ár meistaraflokk karla til leiks á Íslandsmót, árið 2007.

Blak

Þróttur sendi fyrst lið til keppni í blaki, kvenna og karla, 1974. Síðan þá hefur liðið skipað sér í fremstu röð blakliða landsins. Karlaliðið hefur orðið Íslandsmeistari 1977, 1981, 1982, 1983, 1984, 1985, 1986, 1987, 1990, 1996, 1997, 1999 og 2009. Auk þess hefur liðið orðið 14 sinnum bikarmeistari, fyrst 1977 og svo 1978, 1981, 1982, 1983, 1985, 1986, 1988, 1990, 1994, 1996, 1997, 1998 og nú síðast 2009. Kvennaliðið varð íslandsmeistari 1983 og svo aftur 2004, 2005, 2006 og 2007. Kvennalið Þróttar hefur orðið bikarmeistari þrisvar 2004, 2005 og nú síðast 2006.

Tennis

Tennisdeild Þróttar var stofnuð 1990.

Heimild

Jón Birgir Pétursson: Lifi Þróttur. Knattspyrnufélagið Þróttur. 50 ára saga öflugs knattspyrnufélags. (Reykjavík 1999).

Tenglar

• Heimasíða Þróttar
• Heimasíða Köttaranna, stuðningsmanna Þróttar