Ritrýni

Ritrýni er það ferli að að bera fræðileg ritverk höfundar undir sérfræðinga á viðeigandi sviði áður en það er gefið út. Það er mikilvægt að nafnleyndar sé gætt í þessu ferli — bæði er höfundur ritverksins sem rýna skal ónafngreindur og eins eru ritrýnendur ónafngreindir. Þannig vita ritrýnendur ekki hver höfundur ritverksins er né heldur veit höfundur frá hverjum athugasemdir sem honum gætu borist eru.

Ritstjórar fræðitímarita styðjast einkum við ritrýni til þess að velja greinar í tímaritið. Ritrýninni er ætlað að tryggja að ritverk standist fræðilegar kröfur og að ákvarðanir um útgáfu byggist einungis á verðleikum ritverksins. Innan fræðasamfélagsins eru tímarit sem eru ekki ritrýnd gjarnan talin óáreiðanlegri en þau sem eru ritrýnd.

Á endanum er ritstjóri tímarits ábyrgur fyrir því að efni sem valið er til birtingar standist fræðilegar kröfur enda þótt höfundurinn beri einn ábyrgð á innihaldinu. Þegar ritstjóri vísar handriti til ritrýnanda mælir ritrýnandinn yfirleitt með því:

• að handritið sé samþykkt,
• að handritið sé samþykkt ef höfundur lagfærir það á einhvern tiltekinn máta,
• að handritinu sé hafnað en ritstjóri hvetji þó til að það sé endurbætt og sent inn að nýju síðar,
• að handritinu sé hafnað.

Venjulega er hver grein send til tveggja eða þriggja ritrýnenda. Ritrýni er venjulega ekki launuð.