Björn Ingi Hrafnsson

Björn Ingi Hrafnsson (f. 5. ágúst 1973) er fyrrverandi borgarfulltrúi Framsóknarflokksins í Reykjavík. Foreldrar hans eru Hrafn Björnsson (f. 1945) og Björk Gunnarsdóttir (f. 1948). Hann er fæddur í Hveragerði og ólst þar upp, en einnig á Flateyri, Akranesi og í Reykjavík. Árið 2001 kvæntist Björn Ingi Hólmfríði Rós Eyjólfsdóttur hjúkrunarfræðingi (f. 1976) og eiga þau tvo syni börn, Hrafn Ágúst (f. 1999) og Eyjólf Andra (f. 2004). Björn Ingi er stúdent frá Menntaskólanum í Hamrahlíð árið 1993. Eftir það starfaði hann við fjölmiðla og víðar, og nam sagnfræði við Háskóla Íslands, án þess þó að ljúka prófi.

Ferill

Björn var þingfréttaritari Morgunblaðsins til 2002, þegar hann gerðist skrifstofustjóri þingflokks Framsóknarflokksins, sem hann var til 2003. Árin 2002-2004 var hann varaformaður Varðbergs, samtaka um vestræna samvinnu. Sama ár tók hann sæti í miðstjórn SUF frá 2002, og 2003 varð hann aðstoðarmaður Halldórs Ásgrímssonar, utanríkisráðherra 2003-2004 en síðar forsætisráðherra 2004-2006. Árin 2003-2005 var Björn stjórnarformaður Þróunarsamvinnustofnunar Íslands. Kjörtímabilið 2003-2007 var Björn í 2. sæti á lista Framsóknarflokksins í Reykjavíkurkjördæmi suður og var því varaþingmaður Jónínu Bjartmarz.

Fyrir sveitarstjórnarkosningar 2006 bar hann sigurorð af Óskari Bergssyni í prófkjöri og náði kjöri sem eini borgarfulltrúi Framsóknarflokksins, með 6% atkvæða. Myndaði hann borgarstjórnarmeirihluta með Sjálfstæðisflokknum, sem hélt til 11. október 2007, þegar hann sleit samstarfinu eftir harðar deilur um Orkuveitu Reykjavíkur, Geysi Green Energy og Reykjavik Energy Invest (sjá nánar: Deilur um Orkuveitu Reykjavíkur, október 2007). Meðan á þeirri samvinnu stóð var Björn formaður borgarráðs, varaforseti borgarstjórnar, formaður Íþrótta- og tómstundaráðs, stjórnarformaður Faxaflóahafna og varaformaður stjórnar Orkuveitu Reykjavíkur.

24. janúar 2008 sagði Björn af sér sem borgarfulltrúi og lét Óskari Bergssyni starfið eftir. Vikuna sem á undan var gengin var Björn harðlega gagnrýndur af samflokksmanninum Guðjóni Ólafi Jónssyni, fyrrverandi þingmanni, vegna fatakaupa fyrir borgarstjórnarkosningarnar 2006. Björn Ingi kvaðst í tilkynningu ekki lengur geta starfað undir slíkum kringumstæðum.

Ritstörf

• Björn Ingi Hrafnsson: Fram í sviðsljósið - Endurminningar Halldórs G. Björnssonar, Mál og menning, Reykjavík 2001, ISBN 9979-3-2257-8.

• Björn Ingi Hrafnsson: Barist fyrir frelsinu - áhrifamikil saga Guðríðar Örnu Ingólfsdóttur og Hebu Shahin og ævintýralegur flótti þeirra frá Egyptalandi, Vaka-Helgafell, Reykjavík 2002, ISBN 9979-2-1652-2 (innbundin) og 9979216921 (óinnbundin).

Tengill

• Heimasíða Björns Inga Hrafnssonar

Heimildir

• Æviágrip á bloggi Björns Inga
• Mbl.is: Vilhjálmur: Ákvörðun Björns Inga um samstarfsslit fyrirvaralaus
• Mbl.is: Björn Ingi: Handsalaði ekki samkomulag um áframhaldandi samstarf
• Mbl.is: Vilhjálmur: Vorum að nálgast niðurstöðu
• Mbl.is: Vilhjálmur verður borgarstjóri fram á þriðjudag
• Mbl.is: „Fyrrum minnihluti bjargaði Birni Inga fyrir horn"
• Yfirlýsing Björns Inga um afsögn úr borgarstjórn