Efling stéttarfélag

Efling stéttarfélag er íslenskt stéttarfélag sem stofnað var í desember árið 1998. Félagið byggir á sterkum rótum en það varð til við sameiningu verkalýðsfélaganna Dagsbrúnar og Verkakvennafélagsins Framsóknar við Starfsmannafélagið Sókn og Félag starfsfólks í veitingahúsum. Við stofnun Eflingar voru um 14 þúsund einstaklingar í félaginu en árið 2018 voru 27 þúsund félagar í Eflingu.

Ári eftir stofnun Eflingar sameinaðist félagið Iðju, félagi verksmiðjufólks í Reykjavík og árið 2009 sameinaðist Verkalýðs- og sjómannafélagið Boðinn Eflingu stéttarfélagi.

Félagsfólk Eflingar starfar á fjölmörgum sviðum atvinnulífsins bæði hjá opinberum stofnunum og í einkageiranum. Má þar nefna störf í mötuneytum og við ræstingar, við ummönnunarstörf, s.s. í heimaþjónustu, á leikskólum og á sjúkrastofnunum. Eflingarfólk sinnir einnig almennum störfum verkafólks á sviði iðnaðar, framleiðslu, flutninga, byggingarvinnu, við vegagerð og hafnarvinnu, landbúnaðarstörf og annast ýmsa vélavinnu sem tengist verklegum framkvæmdum. Almenn störf á veitinga- og gistihúsum eru unnin af Eflingarfólki og einnig öryggisvarsla og almenn störf við bensínafgreiðslu og á dekkjaverkstæðum.

Meðal stærstu vinnuveitenda innan Eflingar stéttarfélags eru Reykjavíkurborg, fjármála- og efnahagsáðuneyti, skipafélögin, Landspítali, ýmis ræstingafyrirtæki, olíufélögin og Kópavogsbær.

Fyrsti formaður Eflingar var Sigurður Bessason og gengdi hann formennsku í tæp 20 ár eða frá stofnun félagsins árið 1998 til ársins 2018. Núverandi formaður Eflingar er Sólveig Anna Jónsdóttir en hún var kjörin formaður félagsins árið 2018. Varaformaður Eflingar er Agnieszka Ewa Ziółkowska.