Laugardalshöll

Íþróttahöllin í Laugardal, Laugardalshöllin eða Höllin er um 6.500 m² íþrótta-, tónleika-, sýningar- og ráðstefnuhöll í Laugardalnum í Reykjavík. Laugardalshöll var lengi vel stærsta íþrótta- og tónleikahús landsins og hefur í gegnum tíðina hýst ýmsa stórviðburði eins og tónleika Led Zeppelin 1970, skákeinvígi Fischers og Spasskíjs 1972 og Heimsmeistaramótið í handbolta 1995. Í Laugardalshöll hafa auk þess oft verið haldnar stórar vörusýningar, svo sem heimilissýningarnar og atvinnuvegasýningar af ýmsu tagi.

Laugardalshöllin var teiknuð af Gísla Halldórssyni arkitekt 1959 og reist af Reykjavíkurborg og Íþróttabandalagi Reykjavíkur. Hún var vígð 6. desember árið 1965 en fyrsti íþróttaleikurinn sem þar fór fram var leikur úrvalsliðs Reykjavíkur í handbolta gegn landsliði Tékkóslóvakíu 4. desember 1965.

Árið 2005 var hafist handa við að reisa 9.500 m² stálgrindarhús viðbyggt við Laugardalshöllina þar sem salurinn verður sérhannaður með tilliti til frjálsra íþrótta.

Tengill

• Vefsíða Laugardalshallarinnar